बाँकेमे कोरोना संक्रमणसे थप ८ के मृत्यु
काठमाडौं, २ जेठ । कोरोना संक्रमणसे बाँकेमे थप ८ जहनके मृत्यु हुइल बा । बाँकेके टमान अस्पतालमे उपचाररत ३÷३ जाने बाँके ओ बर्दिया, १÷१ जाने रोल्पा ओ कैलालीके संक्रमितके मृत्यु हुइल जिल्लास्तरीय कोरोना संकट व्यवस्थापन केन्द्रके फोकल पर्सन तेज ओली जानकारी डेलैं ।
उहाँक अुनसार भेरी अस्पतालमे उपचाररत नेपालगन्ज उपमहानगर १९ बाँकेके ६० वर्षिय पुरुष, कोहलपुर नगरपालिका–१५ बाँकेके ६७ वर्षिय पुरूष तथा राप्तिसोनारी गाउँपालिका–२, बाँकेके ५२ वर्षिया महिलाके मृत्यु हुइल बा ।
अस्टेक भेरी अस्पतालमे उपचाररत मधुवन नगरपालिका–९, बर्दियाके ७१ वर्षिय पुरूष, बढैयाताल गाउँपालिका–१ के ५० वर्षिय पुरूष ओ बढैयाताल गाउँपालिका–२ के ८७ वषिय पुरूषके मृत्यु हुइल बा ।
अस्टेक गौरीगंगा गाउँपालिका–४, कैलालीके ५२ वर्षिय पुरूषके नेपालगञ्ज मेडिकल कलेजमे शनिच्चर उपचारके क्रममे मृत्यु हुइल बा कलेसे रूम्टीगढी–३, रोल्पाके ३५ वर्षिय पुरूषके भेरी अस्पतालमे उपचारके क्रममे मृत्यु हुइल बा ।
यीसँगे कोरोना संक्रमणसे बाँके जिल्लाभित्तर २ सय ३५ पुगल बा कलेसे अन्य जिल्ला बाहेरके १ सय ८३ जाने कोरोना संक्रमतिके उपचारके क्रममे मृत्यु हुइल बा ।
