चिनियाँ अनुदानके स्वास्थ्य सामग्री बोकल गाडी तातोपानी नाकाओर प्रस्थान
काठमाडौं, २ जेठ । चीनसे नेपालहे अनुदानमे डेहल अक्सिजन सिलिण्डरलगायतके स्वास्थ्य सामग्री बोकल गाडी चीनके खासासे नेपालके तातोपानी नाकाओर प्रस्थान करले बा ।
महावाणिज्य दूतावासके अधिकारी अक्सिजन सिलिण्डर लगायतके स्वास्थ्य सामग्री न्यालम कस्टमसे छुटसेकल जानकारी डेहल तातोपानी भन्सारके अधिकारी बटैलैं ।
तातोपानी नाकाके भन्सार अधिकृत नारद गौतम उ सामान अइटीसाथ आवश्यक प्रक्रिया पूरा करके काठमाडौं पठैना बटैलैं । गौतम कलैं, ‘ओहोरसे सामान अइना जानकारीमे आइल बा, हम्रे ओकर प्रतीक्षामे बाटी । यहाँ अइनासाथ उ सामान हम्रे फास्ट ट्र्याकमे पठाब ।’ कौन–कौन सामान कत्रा–कत्रा परिमाणमे आइटा कना जानकारी नैआपुगल उहाँ बटैलैं ।
तातोपानी भन्सारमे चीनसे उ सामग्री नेपाल सरकारहे हस्तान्तरण करी । ‘स्वास्थ्य मन्त्रालयहे चीन सामान हस्तान्तरण करलपाछे सुरक्षित साथ हली पठैना प्रक्रिया आघे बह्रठ,’ भन्सार अधिकृत गौतम कलैं ।
कोरोना महामारीविरुद्ध लरना सहयोग पुगे कना चीनसे २० हजार थान अक्सिजन सिलिण्डर, भेन्टिलेटर लगायतके स्वास्थ्य सामग्री नेपाल सरकारहे अनुदानमे डेना घोषणा करल बा । कुछ थान सिलिण्डर नेपाल एयरलाइन्सके वाइडबडी जहाजसे बेइजिङसे नन्ले बा । पहिल खेपमे चार सय थान अक्सिजन सिलिण्डर नानल जहाज दोसरे खेप लेहे गैल रात फेर बेइजिङ गैल बा ।
एकचो धेर सामग्री हली नाने सेकजाए कहिके स्थलमार्ग प्रयोग करल उपप्रधानमन्त्री ईश्वर पोखरेल नेतृत्वके कोभिड–१९ संकट व्यवस्थापन सञ्चालन केन्द्र (सीसीएमसी) जनैले बा ।
उपप्रधानमन्त्री पोखरेलके प्रेस सल्लाहकार गणेश पाण्डे चिनियाँ अनुदानके १८ हजार थान अक्सिजन सिलिण्डर स्थलमार्ग हुइटी अइटी रहल जानकारी डेलैं ।
