कोरोना संक्रमणसे वीरगञ्जमे २९ वर्षके चिकित्सकके मृत्यु
वीरगञ्ज, ९ जेठ । वीरगञ्जके हाडजोर्नी रोगके चिकित्सकके कोरोना संक्रमणसे मृत्यु हुइल बा । वीरगञ्ज महानगरपालिका–३, छपकैयाके २९ वर्षिय चिकित्सक मुराद हुसेनके मेडिसिटी अस्पतालमे मृत्यु हुइल हो ।
वीरगञ्ज हेल्थ केयरलगायत टमान अस्पताल तथा स्वास्थ्य संस्थामे काम करल उहाँके कोरोना संक्रमणसे आज बिहान मृत्यु हुइल अस्पताल जनैले बा ।
डा. हुसेन एक महिनाआघे किल शेख मुजीब मेडिकल युनिर्भसिटी बंगलादेशसे पढाइ पूरा करले रहैं ।
कोरोना संक्रमितके उपचारमे समेत खटल डाक्टर हुसैनसँगे वीरगञ्ज हेल्थ केयरके ५ जाने चिकित्सकहे एकचो कोरोना संक्रमण पुष्टी हुइल रहे ।
वीरगञ्ज हेल्थ केयरके सञ्चालक डा. अबुल हैस अन्सारीके अनुसार डा. हुसैनके एक साता जति वीरगञ्जमे ढरके उपचार चलल रहे । मने स्वास्थ्यमे सुधार नैहुइलपाछे १० दिनआघे हेलिकप्टरसे काठमाडौं लैगिल रहे ।
‘संक्रमण पुष्टी हुइलपाछे डाक्टर उदय नारायण सिंह हेरले रहैं, छातीके सिटी करैटीकिल भर्ना करेपरी कना सल्लाह डेलैं’ अन्सारी कलैं, ‘दुनु फोक्सोमे कोभिड निमोनिया डेखाइल रहे, स्वास प्रश्वासमे फेन समस्या रहे ।’
