नेपालहे आगामी साता स्वास्थ्य सामग्री पठाबः डब्ल्यूएचओ
९ जेठ, काठमाडौं । कोरोना भाइरस (कोभिड–१९) के संक्रमण बह्रल कारण अब्बे समस्यामे रहेका दक्षिण–पूर्वी एसियाली मुलुकहे ३४० मेट्रिक टनसे ढेर स्वास्थ्य सामग्री प्रदान करल विश्व स्वास्थ्य संगठन (डब्ल्यूएचओ) जनैले बा ।
आबके कुछ सातामे नेपाल, भुटान, माल्दिभ्स ओ श्रीलंकालगायतके मुलुकमे आवश्यक स्वास्थ्य सामग्री पठैना डब्ल्यूएचओ बटैले बा ।
डब्ल्यूएचओके दक्षिण–पूर्वी एसियाके क्षेत्रीय निर्देशक पुनम खेत्रपाल सिंह कलैं, ‘हजारौं अक्सिजन कन्सन्ट्रेटर, टेस्टिङ किट्स, अस्पतालके बेड, टेन्ट ओ पीपीई अब्बे पाइल सहयोगके मुख्य सामग्री हो । उ सामग्री टमान मुलुक ओ सबसे ढेर आवश्यकता रहल क्षेत्रमे पठाइल बा ।’
पाछेक साता कोरोनासे समस्यामे परल भारतमे पठाइल स्वास्थ्य सामग्री मुलुकके टमान २६ राज्यमे पुगल बा । गैल साता चार हजार अक्सिजन कन्सन्ट्रेटर, १२० टेन्ट, चारसय मेडिकल बेड, १२ लाख रेस्पिरेटर मास्क ओ ६ लाख ५० हजार स्याम्पिलिङ किट्स भारत पठाइल रहे ।
अब्बे डब्ल्यूएचओ बंगलादेशमे ६० मेट्रिक टनके स्वास्थ्य सामग्री पठाल बा ।
