गेटा मेडिकल कलेजमे ५० शय्याके कोभिड केयर सेन्टर सञ्चालन
धनगढी, १० जेठ । कैलालीके गेटामे ५० शैय्याके कोभिड १९ केयर सेन्टर सञ्चालनमे आइल बा ।
निर्माणाधीन गेटा मेडिकल कलेजमे अँट्वारसे कोरोना संक्रमितहुकनके उपचार करना उद्देश्यसे केयर सेन्टर सञ्चालनमे नानल हो ।
संघीय सरकारके पहलमे बैशाख २० गते से कोरोना संक्रमितहुकनके उपचार करना तयारी सुरु करल रहे । सक्कु तयारी पुरा हुसेकलसे फेन अक्सिजन नैहुके गेटामे संक्रमितहुक्रे उपचार पैले नैरहैं ।
विघटित प्रतिनिधि सभा सदस्य नारदमुनि राना तथा एमालेके नेता लेखराज भट्टके पहलमे २ सय सिलिन्डर ग्यास कैलाली पुगलपाछे गेटामे कोभिड १९ केयर सेन्टर सञ्चालन करल हो ।
‘आवश्यक जनशक्ति, अक्सिजन, उपकरणलगायतके तयारी पुरा हुइलपाछे सेवा सुरु करले बाटी’ गोदावरी नगरपालिकाके प्रवक्ता शर्मानन्द भट्ट कलैं, ‘संक्रमित अइटीकिल यहाँ उपचार पैही ।’
अक्सिजनके अभाव हुइल संक्रमितहुकनहे यहाँ ढरके उपचार करना हुइलेसे फेन जटिल संक्रमित जिहिनहे भेन्टिलेटर ओ आइसियु आवश्यक हुइ ओइनहे सेती प्रादेशिक अस्पतालमे रेफर करना उहाँ बटैलैं ।
जिल्ला कोभिड संकट व्यवस्थापन केन्द्र (डीसीसीएमसी) मातहत रहना मेरिक सुदूरपश्चिम प्रदेश सरकार, धनगढी उपमहानगरपालिका, गोदावरी नगरपालिकाके सहकार्यमे उ आइसोलेसन सञ्चालनमे आइल हो ।
