धनगढीसे वडामे कोरोना परीक्षण ओ घरमे औषधि वितरण

पहुरा समाचारदाता
धनगढी, ११ जेठ । धनगढी उपमहानगरपालिकाके डुर रहल वडामे पुगके कोरना परीक्षण करना सुरु करले बा । अस्टेक कोरोना पोजेटिभ डेखाइलहे घरमे औषधि समेत वितरण करे लागल बा ।

सोम्मारसे डुरके वडामे पुगके लक्षण डेखाइलहुकनके एन्टिजेन मार्फत कोरोना परीक्षण करे लागल उपमहानगरपालिकाके स्वास्थ्य निरीक्षण लक्ष्मीराज उपाध्याय बटैलैं । खास करके धनगढी उपमहानगरपालिकासे संचालन करल स्वाव परीक्षण केन्द्रसम पुग्न समस्या रहल वडामे टोलमे पुगके कोरोना परीक्षण सुरु करले बाटी, स्वास्थ्य निरीक्षण उपाध्याय कलैं, अस्टेक औषधि ओ स्वास्थ्य सम्बन्धी जनचेतना समेत डेठी ।

गैल वर्ष फेन धनगढी उपमहानगरपालिका टोलमे पुगके कोरोना परीक्षण करले रहे, स्वास्थ्य निरीक्षण उपाध्याय कलैं, अब्बे डुरके वडामे किल ओहे पुगके कोरोना परीक्षण करना काम सुरु करले बाटी । जस अन्तर्गत सोम्मार वडा नम्बर १७ मे एन्टीजेनमार्फत कोरोना परीक्षण करल उपाध्याय बटैलैं ।

वडा नम्बर १७ मे जुरी आके घरे रहल २३ जहनहे परीक्षण करलमे ३ जहनहे कोरोना पोजेटिभ डेखाइल बा, स्वास्थ्य निरीक्षण उपाध्याय कलैं, कोरोना ओ अन्य जुरी आइल बिरामीहे घरमे औषधीके साथे स्वास्थ्य शिक्षा समेत डेली बाटी । वडा नम्बर १९ मे फेन कोरोना परीक्षणके तयारी हुइटीरहल बटैले बाटैं ।

धनगढी उपमहानगरपालिका अपने स्वाव संकलन केन्द्र स्थापना करके गैल वर्षसे कोरोनाके स्वाव संकलन करटी आइल बा ।