सुदूरपश्चिम एमाले संसदीय दलके बैठक जारी
धनगढी, १२ जेठ । सुदूरपश्चिम प्रदेशमे एमाले संसदीय दलके बैठक चलटा । दलके कार्यालयके सुरु बैठकमे सभामुख बाहेकके २४ जाने सांसदमध्ये बैठकमे २१ सांसद उपस्थित बाटैं ।
बैठकमे ओली पक्षके ३ सांसद उपस्थित हुइल बाटैं । बैठकमे नेपालु चौधरी, पठानसिंह बोहरा ओ माया तामाङ बोहरा उपस्थित हुइल हुइट । अन्य ३ सांसद कैलालीसे बाहेर रहल ओरसे उपस्थित नैहुइल बटागिल बा ।
५२ जाने प्रदेशसभा सदस्य रहल सुदूरपश्चिम प्रदेशमे एमालेके २५ जाने सांसद बाटैं । सभामुखबाहेक २४ जानेमे नेपाल पक्षके १८ ओ ओली पक्षमे ६ जाने सांसद बाटैं ।
सोम्मार एमालेके स्थायी कमिटीके बैठकसे प्रदेश सरकारहे डेहल समर्थन फिर्ता लेसेकल बा । एमालेसे मन्त्री हुइलहुकनहे २४ घण्टाभित्तर फिर्ता हुइना निर्देशन जारी करल बा ।
स्थायी कमिटीके बैठक पाछे बैठल दलके बैठकहे अर्थपूर्ण रुपमे हेरल बा । स्थायी कमिटीसे सरकारके समर्थन फिर्ता लेना निर्णय करलेसे फेन एमाले संसदीय दलमे नेपाल पक्ष यी सरकारहे निरन्तरता डेना सम्भावना डेखाइलबा ।
ओली पक्ष भर केन्द्रके निर्देशन अनुसार सरकारसे फिर्ता हुइपरना ओ मन्त्रीहुक्रे राजीनामा डेहेपरना दबाब डेना बटैले बाटैं ।
