धनगढीमे प्रधानमन्त्री ओ राष्ट्रपतिविरुद्ध मसाल जुलुस

धनगढी, १२ जेठ । प्रधानमन्त्री केपी शर्मा ओली ओ राष्ट्रपति विद्यादेवी भण्डारीविरुद्ध सुदूरपश्चिमके अस्थायी राजधानी धनगढीमे प्रदर्शन हुइल बा ।

नेपाली काँग्रेसके भातृ संगठन तरुण दल कैलालीसे धनगढीमे राँके जुलुससहित प्रधानमन्त्री ओ राष्ट्रपतिके सेटिङमे प्रतिनिधिसभा विघटन करल विरोधमे प्रदर्शन करल जनैले बा ।

तरुण दलके जिल्ला अध्यक्ष दीपेन्द्र बम संसद विघटन करना प्रधानमन्त्री ओ राष्ट्रपतिके कदमके विरुद्ध राँके जुलुससहित प्रर्दशन करल बटैलैं ।

तरुण दल संविधानके धारा ७६ के ५ बमोजिम काँग्रेस सभापति शेरबहादुर देउवाहे प्रधानमन्त्रीमे नियुक्त करना फेन माग करले बा ।