संसद विघटनविरुद्धके रिटके सुनुवाइ सुरु
काठमाडौं, १३ जेठ । संसद विघटनविरुद्ध सर्वोच्च अदालतमे परल रिटके सुनुवाइ सुरु हुइल बा । प्रधानन्यायाधीश चोलेन्द्रशमशेर जबराके बेन्चमे परल १९ रिटउप्पर सुनुवाइ सुरु हुइल हो ।
पहिल नम्बरमे वीरभद्र जोशीसहित दायर करल रिट निवेदन बा । जोशी बहस सुरु करले बाटैं ।
अन्तरिम आदेश माग करल १९ रिटके सुनुवाइ प्रधाननन्यायाधीश जबरा अपन एकल बेन्चमे हुइना करके तोकले बाटैं । संवैधानिक इजलासमे सुनुवाइके माग करल ११ रिटके भर जेठ १४ गते शुकके लाग पेशी तोकल बा ।
सरकारके सिफारिसमे राष्ट्रपति विद्यादेवी भण्डारीसे धारा ७६(५) बमोजिमके प्रधानमन्त्री नियुक्ति हुइना आधार नैरहल कटी संसद विघटन करके मध्यावधि निर्वाचन घोषणा करलपाछे उविरुद्ध ३० ठोरिट दर्ता हुइल बा ।
संसद विघटन असंवैधानिक रहल जिकिर करटी ओ धारा ७६(५) अनुसार शेरबहादुर देउवाहे प्रधानमन्त्री नियुक्त करेपरना माग करके विपक्षी गठबन्धनके १४६ जाने सांसदसे फेन सर्वोच्च अदालतमे रिट दर्ता करले बाटैं ।
गैल जेठ ७ गते मन्त्रिपरिषदके सिफारिसमे राष्ट्रपति विद्यादेवी भण्डारीसे संसद विघटन करके आगामी कात्तिक २६ ओ मंसिर ३ गते निर्वाचनके मिति तोकले बाटी ।
