निसर्गमे सिटी स्क्यान जडान, आब न्यूरो ट्रमा थप सबल
पहुरा समाचारदाता
धनगढी, १७ जेठ । कैलालीके धनगढीमे रहल अत्याधुनिक निसर्ग हस्पिटल एण्ड रिसर्च सेन्टरमे सिटी स्क्यानसहित न्यूरो ट्रमा सेवा सुदूरपश्चिममे पहिलचो सुरु हुइल बा ।
यीआघे अन्य हस्पिटलमे सिटी स्क्यान सेवा रलेसे फेन न्यूरो ट्रमा सेवा भर उपलब्ध नैरहे । सुदूरपश्चिममे सिटी स्क्यानसहितके न्यूरो ट्रमा सेवा निसर्गमे सुरु करल हो ।
निसर्ग हस्पिटल गैल फागुनमे न्यूरो ट्रमा सेन्टर स्थापना करलेसे फेन सिटी स्क्यान नैरहे । बाहेरसे सिटी स्क्यान करल बिरामीके न्यूरो सर्जरी भर अस्पताल करटी आइल रहे ।
बाहेरसे करल सिटी स्क्यानके आधारमे अप्रेसन करलेसे फेन बिरामीके अवस्था थाहा पाइक लाग पुनः सिटी स्क्यान करेपारना हुइल ओरसे ओकर लाग विरामीहे अन्य अस्पतालमे पठाइबेर झण्डटिलो किल नैहुके जोखिम डेखाइलपाछे अप्नही सिटी स्क्यान मेसिन जडान करल अस्पतालके अध्यक्ष तीर्थराज पन्त बटैलैं ।
‘हम्रे सुदूरपश्चिममे पहिलचो न्यूरो ट्रमा सेवा सुरु करली, ३ महिनाके अवधिमे करिब ४८ जहनके अप्रेसन सम्पन्न हुइल’, अध्यक्ष पन्त कलैं, ‘न्यूरो टिम रहिके फेन सिटी स्क्यान नैहुके कुछ अपुगजस्टे लागल ओ लकडाउनके बीच फेन सिटी स्क्यान मेसिन मगाके जडान करली ।’
अमेरिकन जीई कम्पनीके अत्याधुनिक सिटी स्क्यान मेसिन अस्पताल साढे तीन करोडके लागतमे जडान करल हो ।
अस्पतालमे न्यूरो सर्जन डा सुरेश सापकोटा, नाक, कान तथा घाँटी रोग विशेषज्ञ डा सुमन थापा, मुख, अनुहार तथा बङ्गारा रोग विशेषज्ञ डा दीपक ठकुराठी ओ एनेस्थेसियोलोजिस्ट डा हेमन्त ओझाके टिमसे न्यूरो सर्जरी करटी आइल बा ।
‘न्यूरोके बिरामीहुक्रे यीआघे रेफर करेपरना अवस्था रहे’, न्यूरो सर्जन डा सापकोटा कलैं, ‘आब नेपालगञ्ज ओ काठमाडौंके कुछ अस्पतालमे उपलब्ध हुइना सेवा यहैँ डेहे सेक्ना हुइल बा ।’
निसर्ग हस्पिटल कोरोनाके दोसर लहरसँगे संक्रमितके लाग आईसीयूमे चार बेड, हाई केयर १२ बेड ओ पाँच बेड कोभिड केयर सञ्चालन करले बा । कोरोनाके दोसर लहर फैललपाछे अस्पताल १०७ जाने संक्रमितके उपचार करसेकले बा । अभिन फेन अस्पतालमे कोरोना संक्रमितके उपचार हुइटी बा ।
अस्पताल ११ आईसीयू, ६ भेन्टिलेटर ओ २५ शय्या जनरल बेडमार्फत सेवा डेटीरहल अध्यक्ष पन्त बटैलैं । ३ वर्षआघे करिब पाँच करोडके लगानीमे सुरु हुइल अस्पतालके लागत अब्बे करिब २० करोड पुगल बा ।
हाल अस्पतालमे टमान विभागके १४ जाने कन्सल्टेन्ट डाक्टर, ५ जाने एमबीबीएस डाक्टर ओ प्यारामेटिसिन ओ नसिंङ करके सय जाने सेवा डेटी बाटैं ।
आगामी कुछ समयभित्रे अस्पतालसे एमआरआई सेवा सञ्चालन करना योजना रहल अध्यक्ष पन्त जानकारी डेलैं ।
