बैतडीमे प्रवेश करे चाहल यात्रुके नाकामे कोराना परीक्षण
बैतडी, १८ जेठ । दोसर लहरके कोरोना भाइरसके संक्रमण तीव्र रूपमे फैलटीरहल ओकर रोकथाम ओ नियन्त्रणके लाग जिल्ला भित्रना यात्रुहुकनके कोरोना परीक्षण शुरू हुइल बा ।
खोडपेमे हेल्थ डेस्क स्थापना करके आजसे एन्टीजेन विधिसे जिल्ला भित्रना यात्रुहुकनके परीक्षण शुरू करल बैतडीके प्रमुख जिल्ला अधिकारी राजेन्द्रदेव पाण्डे जानकारी डेलै । जिल्ला भित्रना यात्रुवाहक सवारी साधनहे बिहान ६ बजेसे साँझ ७ बजेसम किल भित्रना डेहल हो ।
आजसे शुरू हुइल तेसर चोके निषेधाज्ञाके आदेश जारी करटी रातके समयमे जिल्ला भित्रना यात्रुवाहक सवारी साधनमे रोक लगाइल हो ।
विहान ६ बजेसे साँझ ७ बजेसम खोडपेमे स्थापना करल हेल्थ डेस्कमे स्वास्थ्यकर्मी परिचालन करके कोरोना परीक्षण कार्य हुइटीरहल प्रमुख जिल्ला अधिकारी पाण्डे बटैलैं । हेल्थ डेस्कमे यात्रुके कोरोना परीक्षण करना ओ पोजेटिभ आइलहे आइसोलेसन ण्रना ओ नेगेटिभ आइलहे घर जाइ डेजाइ,’ उहाँ कलैं, ‘कोरोना संक्रमण रोकथाम तथा नियन्त्रणके लाग जिल्ला भित्रना नाकामे परीक्षण करटी ।’
हेल्थ डेस्कमे कोरोना परीक्षण करेक लाग ६ जाने स्वास्थ्यकर्मी परिचालन करल स्वास्थ्य कार्यालय बैतडीके प्रमुख योगेशप्रसाद भट्ट जानकारी डेलैं । कुछ दिनआघे बैठल जिल्ला कोभिड संकट व्यवस्थापन केन्द्रके बैठकसे खोड्पेमे हेल्थ डेस्क स्थापना करना निर्णय करल रहे । जिल्लामे कोरोनाके चेन ब्रेक करेक लाग तराईसे आइलके फेन परीक्षण आवश्यक रहल ओरसे परीक्षण शुरू हुइल स्वास्थ्य प्रमुख भट्टके कहाइ बा ।
यीआघे भारतसँग जोरल सीमानाके झुलाघाटमे फेन हेल्थ डेस्क स्थापना करके कोरोना परीक्षणके काम हुइटी बा । बैतडीमे तेसरचो निषेधाज्ञा थप करटी जेठ ३१ गतेसम लम्ब्याइल बा । कोरोना संक्रमणदर न्यूनीकरणके लाग निषेधाज्ञाके अवधि थपल जनाइल बा । संक्रमणके जोखिम अभिन कायमे रहल ओरसे निषेधाज्ञाहे निरन्तरता डेहल हो ।
निषेधाज्ञाके अवधिमे आवतजावतमे पूर्ण रूपमे रोक लगाइल बा । खाद्य पसल, तरकारी पसल बिहान ७ से ९ बजेसम किल खोले पैना जिल्ला प्रशासन कार्यालय जनैले बा ।
अस्टेक निषेधाज्ञाके समयमे खाद्य पदार्थके मूल्य बह्राइलमे कारबाही हुइना आदेशमे उल्लेख करल बा । अस्टेक बैंक तथा वित्तीय संस्थासे फेन आलोपालो मिलाके हप्तामे तीन दिनकिल दिनके २ घण्टा सेवा डेहेपरना आदेशमे उल्लेख करल बा ।
विकास निर्माणके हकमे भर सम्बन्धित योजनाके प्रमुखके सिफारिशमे जिल्ला प्रशासन कार्यालयके अनुमतिमे किल सञ्चालन करना पैना आदेशमे उल्लेख करल बा ।
निषेधाज्ञाके अवधिमे सब मेरिक सभा सम्मेलन ओ बैठकमे रोक लगाइल बा कललेसे विवाह ब्रतबन्ध जैसिन कार्यमे कम मनैन्के सहभागिता हुइपरना उल्लेख करल बा ।
आदेशके उल्लंघन करलमे कोभिड १९ संकट व्यवस्थापन सम्बन्धमे व्यवस्था करना बनल अध्यादेश २०७८ ओ स्थानीय प्रशासन ऐन, २०२८ अनुसार कारबाही हुइना उल्लेख करल बा ।
भारतसँग सीमा जारल बैतडी जिल्लामे हाल ४९८ जाने कोरोना सक्रिय संक्रमित रहल बाटै कलेसे कोरोनाके कारण हालसम १५ जानेक मृत्यु हुसेकल बा ।
