सिनोभ्याकके कोरोना खोपहे डब्लूएचओसे आपत्कालीन प्रयोगके अनुमति डेहल
काठमाडौं, १९ जेठ । विश्व स्वास्थ्य संगठन (डब्लूएचओ) चिनियाँ औषधि निर्माता कम्पनी सिनोभ्याकसे बनाइल कोरोना खोपहे आपत्कालीन अनुमति लेले बा । सिनोभ्याकसे उत्पादन करल ‘कोरोनाभ्याक’ हे डब्लूएचओसे अनुमति डेहल हो ।
कोरोनाभ्याकसे आपत्कालीन अनुमति पाइलसँगे यिहिनहे डब्लूएचओके विश्वव्यापी खोप परियोजना ‘कोभ्याक्स’ मे यकर प्रयोग करजाइ । यी खोप डब्लूएचओसे अनुमति पैना दोसर चिनियाँ कोरोना खोप हो । यीआघे मे महिनाके सुरुवातमे सिनोफार्मसे उत्पादन करल कोरोना खोपहे डब्लूएचओसे आपत्कालीन प्रयोगके अनुमति डेले रहे ।
मंगरके रोज जेनेभामे आयोजित प्रेस ब्रिफिङके क्रममे डब्लूएचओके महानिर्देशक डा. टेड्रोस एढहानोम गेहब्रेयसस सिनोभ्याकसे उत्पादन करल कोरोना खोप ‘सुरिक्षत, प्रभावकारी ओ गुणस्तरीय रहल पाइल’ बटैलैं ।
डब्लूएचओके स्ट्राटेजिक एडभाइजरी ग्रुप अफ एक्सपर्ट्स अन इम्युनाइजेसन(सेज) फेन सिनोभ्याकके खोपबारे अध्ययन करले रहे । अध्ययनके क्रममे मिलल प्रमाणके आधारमे डब्लूएचओसे उ खोप १८ वर्ष ओ उहिनसे उप्परके उमेर समूहहे लगैना सिफारिस करल बा ।
दुईसे चार हप्ताके बीचमे उ खोपके दुई मात्रा लगाइपरना बा । कोरोनाभ्याक खोप लगाइल ५१ प्रतिशतमे संक्रमण हुइ नैडेना ओ शतप्रतिशतहे अस्पताल भर्ना हुइना अवस्थासे रोकल बटागिल बा ।
डब्लूएचओसे यीआघे फाइजर–बायोएनटेक, एस्ट्राजेनेका, मोडर्ना, जान्सेन (जोन्सन एन्ड जोन्सन) ओ सिरम इन्स्टिच्युटके कोभिसिल्डहे आपत्कालीन प्रयोगके अनुमति डेले रहे ।
