सुदूरपश्चिम संसदीय दलके नेता शाहहे ४८ घण्टे स्पष्टीकरण
धनगढी, २१ जेठ । सुदूरपश्चिम प्रदेश संसदीय दलके नेता प्रकाश शाहहे एमालेके केन्द्रीय अध्यक्ष केपी शर्मा ओली स्पष्टीकरण पुछ्ले बा ।
बिफेक रोज अध्यक्ष ओलीसे शाहहे ४८ घण्टे स्पष्टीकरण पुछल एमाले प्रदेश सचिव राजेन्द्र रावल जानकारी डेलैं । यीआघे उहाँहे प्रदेश कमिटी फेन स्पष्टीकरण पुछ्ले रहे । शाह केन्द्रीय सदस्य रहल ओरे केन्द्रीय कमिटीके ओरसे अध्यक्ष ओली स्पष्टीकरण पुछद हुइल ।
जेठ १० गतेके एमाले स्थायी कमिटी बैठकसे सुदूरपश्चिम सरकारउप्परके समर्थन फिर्ता लेले रहे । मने, प्रदेश संसदीय दल भर नेतृत्वके निर्देशन अटेर करल कटी कारवाही प्रक्रिया सुरु करले बा ।
शाहहे पुछल स्पष्टीकरणमे पार्टी केन्द्रसे समर्थन फिर्ता लेसेकल विपक्षी दलके प्रदेश सरकारके मन्त्री पदमे काहे रहल ? कना पुछल बा । अस्टेक गुटके भेलामे सहभागी हुइना ओ औरेहे समेत सहभागी हुइना उत्प्रेरित करना करल आरोप लगाइल बा ।
अध्यक्ष ओली शाहहे एमाले सुदूरपश्चिम प्रदेश संसदीय दलके विधान समेतके आधारमे पार्टीके साधारण सदस्य समेत नैरहना मेरिक काहे निष्कासन नैकरना ? कटि चित्तबुझ्ना जवाफ मागले बाटैं ।
