कैलालीमे प्रधानमन्त्री ओली ओ उपप्रधानमन्त्री महतोके पुत्ला दहन
धनगढी, २३ जेठ । कैलालीमे प्रधानमन्त्री केपी शर्मा ओली ओ उपप्रधानमन्त्री तथा सहरी विकासमन्त्री राजेन्द्र महतोके पुत्ला दहन करल बा । जिल्लाके घोडाघोडी नगरपालिका–१, सुखड चोकमे नेकपा माओवादी केन्द्र निकट वाइसियल ओ अखिल क्रान्तिकारी विरोध प्रदर्शन करटी पुत्ला दहन करल हो ।
संविधान विरोधी अभिव्यक्ति डहेल कटि उपप्रधानमन्त्री महतोके पुत्ला दहन करल हो कलेसे ढुंगा, गिटी, बालुवा निकासी करना मेरिक हचुवाके भरमे कार्यक्रम नानल कटि प्रधानमन्त्री ओलीके समेत पुत्ला दहन करल बटागिल बा ।
उपप्रधानमन्त्री महतो पदभार ग्रहण करलपाछे नेपालहे बहुराष्ट्र ओ बहुराज्य बनैना मुक्ति आन्दोलन आवश्यक रहल अभिव्यक्ति डेले रहैं । यकर चौतर्फी विरोध हुइटा । अस्टेक सरकार बजेट वक्तव्यमे चुरे क्षेत्रके ढुंगा, गिटी, बालुवा निकासी करके व्यापार घाटा कम करना उल्लेख करलपाछे ओकर फेन विरोध हुइटा ।
