सुदूरपश्चिम सरकार जोगाइक लाग प्रचण्डके दौडधुप
काठमाडौं, २४ जेठ । सुदूरपश्चिम प्रदेश सरकारके मुख्यमन्त्री त्रिलोचन भट्ट मंगरके रोज विश्वासके मत लेना तयारी करलपाछे नेकपा माओवादी केन्द्रके अध्यक्ष पुष्पकमल दाहाल प्रचण्डके दौडधुप बह्रल बा ।
उहाँ आज नेकपा एमालेसे निष्कासित नेता माधवकुमार नेपाल ओ नेपाली काँग्रेसके सभापति शेरबहादुर देउवासँग छलफल करलैं । नेता नेपालहे भेटे उहाँक निवास कोटेश्वर पुगल प्रचण्ड उलगत्ते देउवा निवास बूढानीलकण्ठ पुगल रहैं ।
दुनु नेतासँगके भेटमे प्रचण्ड सुदूरपश्चिमके मुख्यमन्त्री भट्टहे विश्वासके मत डेना विषयमे बाटचित करल माओवादी केन्द्रके नेता देव गुरुङ जानकारी डेलैं ।
सुदूरपश्चिममे माओवादी केन्द्रके नेतृत्वमे सरकार बा । यीआघे सत्ता साझेदार करल नेकपा एमाले प्रदेश सरकारहे डेहल समर्थन फिर्ता लेके मुख्यमन्त्रीके राजीनामा माग करलओरसे मुख्यमन्त्री भट्ट प्रदेशसभामे विश्वासके मत लेहे लागल हुइँट् ।
विपक्षी गठबन्धनमे एमालेके माधव नेपाल समूहहे अध्यक्ष केपी शर्मा ओली एकताके आह्वान करलओरसे प्रदेशमे यी समूहके भूमिका परिवर्तन हुइसेक्ना संभावना डेखलवाद प्रचण्ड चास डेके नेपालहे भेट करल हुइँट् ।
काँग्रेस सभापति देउवाके सहयोगी भानु देउवा सुदूरपश्चिम सरकारके विषयमे छलफल हुइल जानकारी डेलैं । भेटमे दुनु पार्टीके प्रदेश संसदीय दलके नेताहे मुख्यमन्त्रीके पक्षमे मतदान करना निर्देशन डेनामेरिक छलफल हुइल देउवा बटैलैं ।
सम्बन्धित समाचार
