कञ्चनपुरमे ३ दिनमे लागूऔषधसहित १० पक्राउ
कञ्चनपुर, २५ जेठ । कञ्चनपुरमे लागूऔषध सेवनकर्ता ओ कारोबारीहे प्रहरी धमाधम पक्राउ करे लागल बा । बिटल ३ दिनके अवधिमे १० जहनहे प्रतिबन्धित लागूऔषध खैरो हेरोइनसहित पक्राउ करले बा । पक्राउ पर्नामे १८ से २७ वर्ष उमेर समूहके बटैं ।
जिल्ला प्रहरी कार्यालय कञ्चनपुरके प्रहरी नायब उपरीक्षक अमरबहादुर थापा क्षेत्रीके अनुसार शनिच्चर दोधारा चाँदनी ओ पुनर्वास नगरपालिकासे ५ ओ अँट्वार बेलडाँडी गाउँपालिका क्षेत्रसे २ जहनहे पक्राउ करले बा । अस्टेक, सोम्मार शुक्लाफाँटा नगरपालिका १० झलारी बजार क्षेत्रसे ३ जहनहे पक्राउ करल क्षेत्री जानकारी डेलैं ।
गैल वैशाखसे जेठ २३ गतेसम ४५ जहनहे लागूऔषधसहित पक्राउ परल बटैं । अस्टेक, वैशाखसे हालसम लागूऔषधके ३० ठो मुद्दा दर्ता हुइल बा ।
निषेधाज्ञा जारी हुइलवाद लागूऔषध ओसारपसारमे संलग्नहुक्रे ढेर सक्रिय डेखाइल प्रहरी बटाइठ । सीमा क्षेत्रमे सशस्त्र प्रहरी ओ नेपाल प्रहरीसे गस्तीसँगे चेकजाँचहे तीव्र बनाइलओरसे लागूऔषध सेवनकर्ता ओ कारोबारी पक्राउ परे लागल हुइँट् । कुछ महिनाआघे सशस्त्र प्रहरीके कारबाहीमे १ जाने भारतीय लागूऔषध तस्करके मृत्यु समेत हुइल रहे ।
