भारतमे ६३ दिनपाछे १ लाखसे कम कोरोना संक्रमण
काठमाडौं, २५ जेठ । कोरोना भाइरस महामारीके दोसर लहरके कारण अस्तव्यस्त बनल भारतमे बिटल कुछ दिनयहोर संक्रमण घटे लागल बा । भारतके स्वास्थ्य तथा परिवार कल्याण मन्त्रालयके अनुसार बिटल २४ घण्टामे ८६ हजार ४ सय ९८ जहनमे संक्रमण पुष्टि हुइल बा ।
भारतमे ६३ दिनपाछे १ लाखसे कममे संक्रमण पुष्टि हुइल हो । अस्टके सोम्मार भारतमे ६६ दिनयहोरके कम संक्रमण डेखाइल फेन मन्त्रालय जनैले बा ।
अस्टेक पाछेक २४ घण्टामे भारतमे १ लाख ८२ हजारसे ढेर चोखाइल बटैं । भारतमे हालसम कुल २ करोड ८९ लाख ९६ हजार ४ सय ७३ जहनमे संक्रमण पुष्टि हुसेकल बा । अस्टेक भारतमे संक्रमणमुक्त हुइनाके संख्या २ करोड ७३ लाख ४१ हजारसे ढेर बा ।
पछिल्का २४ घण्टामे भाइरसके संक्रमणके कारण २ हजार १ सय २३ जाने ज्यान गुमैले बटैं । यीसँगे भारतमे हालसम कोभिड–१९ के संक्रमणसे मृत्यु हुइनाके संख्या ३ लाख ५१ हजार ३ सय ९ पुगल बा । भारतमे हाल १३ लाख ३ हजार ७ सय २ जाने सक्रिय संक्रमित बटैं ।
भारतमे गैल मे महिनाके ७ तारिखमे एक्केदिन ४ लाख १४ हजार १ सय ८८ जहनमे संक्रमण पुष्टि हुइल रहे । भारतमे एक्केदिन सबसे ढेर मे हिनाके १९ मे ४ हजार ५ सय २९ जहनके कोरोनासे मृत्यु हुइल रहे ।
भाइरस प्रभावित देशके सूचीमे भारत विश्वके दोसर स्थानमे बा । सबसे ढेर प्रभावित अमेरिकामे ३ करोड ३३ लाख ७७ हजारसे ढेर संक्रमित बटैं । अमेरिकामे कोरोनासे करिब ५ लाख ९८ हजार जहनके मृत्यु हुइल बा । मंगर बिहानसम विश्वभर १७ करोड ३५ लाख ४४ हजारसे ढेर संक्रमित हुसेकल बटैं । उमध्ये ३७ लाख ३४ हजारसे ढेरके ज्यान गैल जोन्स हप्किन्स विश्वविद्यालय जनैले बा ।
