असार दोसर सातासे ‘स्मार्ट लकडाउन’
काठमाडौँ, ३ असार । कोभिड १९ व्यवस्थापन निर्देशक समितिके दोसर बैठकसे कोरोना भाइरस (कोभिड–१९) संक्रमणके जोखिम रोक्ना ओ सँगे अत्यावश्यक वस्तु उत्पादन ओ आपूर्तिसहित ‘स्मार्ट लक डाउन’ ओर जैना निर्णय करले बा ।
आबके साता जारी लकडाउन कायम रख्टि उपाछेक अवस्था मूल्यांकन करना ओ स्वास्थ्य मापदण्ड कडाइके साथ पालना कराके कुछ क्षेत्र खुल्ला करेपरना निष्कर्ष समिति निकारल जानकारी प्रधानमन्त्रीके निजी सचिवालय डेले बा ।
प्रधानमन्त्री एवम् समितिके अध्यक्ष केपी शर्मा ओलीके अध्यक्षतामे प्रधानमन्त्री निवास बालुवाटारमे बुधके रात बैठल समितिके बैठकसे नेपाली श्रमिक अधिक संख्यामे रहल टर्की, कतार, साउदी अरेबिया, युएई ,जापान ओ मलेसिया जैसिन देशमे हवाई उडान पुनः संचालन करना निर्णय करले बा । यी देशसे सातामे दुई हजारजाने यात्रुसे नैबह्रना मेरिक हवाई उडान सञ्चालन हुइ ।
बैठकसे वैदेशिक रोजगारीमे गैल मने टमान कारणसे होटलके क्वारेन्टाइनमे बैठे नैसेक्ना कामदारके लाग सहयोग रकम उपलब्ध करैना निर्णयसमेत करले बा । कुल १५ दिन बैठेपरना क्वारेन्टाइनके लाग १० दिनसमके खर्च सरकार व्यवस्थापन करी ।
बैठक सिसिएमसी केन्द्रके प्रशासनिक कार्यके लाग बजेट व्यवस्था करना तथा निर्माण क्षेत्र ओ अत्यावश्यक उद्योगहे स्वास्थ्य मापदण्ड पालनाके साथ खोले डेनासमेत निर्णय करल बा ।
अस्टेक, गैर आवासीय नेपालीसे पठाइ लागल अक्सिजन सिलिन्डर नन्ना हवाई ढुवानी भाडा सरकारसे उपलब्ध करैना एवं इजरायल सरकारसे सहयोग स्वरुप डेहे लागल सघन उपचारमे प्रयोग हुइना सामग्री स्वीकार करना निर्णय फेन बैठक करले बा ।
बैठकमे निर्देशन डेटि प्रधानमन्त्री ओली स्वास्थ्य मापदण्डमे कडाइ करटि लकडाउनहे संक्रमणके जोखिम नैहुइना हदसम किल खुकुलो करे सेक्ना बटैलैं ।
