सेतीमे पानीके बहाव बह्रल, सतर्क रहन आग्रह

डोटी, ४ असार । लगातारके वर्षाके कारण डोटीके सेती लडियामे पानीके बहाव बह्रल बा । बहाव बह्रल ओरसे लडिया आसपासके बस्तीमे खतरा बह्रल कटि सचेत रहन जिल्ला प्रशासन कार्यालय सब नागरिकहे आग्रह करले बा ।

डोटीके गोपघाट ओ दिपायलमे रहल बाढी मापन केन्द्रके अनुसार जलसतह मापनसे अधिक बह्रल बा । सेती लडियामे करल पानीके बहाव मापनअनुसार ८.४ क्युसेक पुगल बा । यी ‘वार्निङ प्वाइन्ट’ से उप्पर हो ।

केन्द्रके अनुसार ३.५ क्युसेक बाढीके बहाव हुइलेसे लडियामे बाढीके ढेर खतरा हुइठ । लडिया यहाँक धान रोपेके खेतमे कटान करके बहाइ लागल बा । सेती लडिया आसपासके बस्ती बानीडुग्रीसैन, गोपघाट, बारपाटा, सिरखोलीसैन, कालागाढ, रामपुर, दिपायल, घोल्तडा, भागेतडा, कैलडा तथा नारीदाङके स्थानीयवासीहे विशेषकरके रातके समयमे सचेत रहना प्रहरी प्रशासन आग्रह करले बा । अस्टेक लडियामे पानीके बहाव बह्रे लागलसँगै इलाका प्रहरी कार्यालय दिपायल, प्रहरी चौकी तिल्तालीके टोली नागरिकहे लडिया क्षेत्रमे नैजैना तथा सचेत रहन माइकिङ करलटा ।

सेतीमे पानीके बहाव बह्रल ओरसे लडिया आसपासके नागरिकहे सुरक्षित रहना ओ लडियामे मच्छी मारे आइल नागरिकहे कुछ दिन लडियामे नैजैनासमेत आग्रह करल प्रमुख जिल्ला अधिकारी सुनिल खनाल बटैलैं ।

लगातारके वर्षाके कारण बाढीपहिरो अइना खतरा बह्रल ओरसे प्रजिअ खनाल विपद् व्यवस्थापनमे जुटेक लाग जिल्लाका तीनु सुरक्षा निकाय नेपाली सेना, नेपाल प्रहरी तथा सशस्त्र प्रहरीहे ‘हाइअलर्ट’ मे बैठ्ना निर्देशनसमेत डेले बटैं ।

विपद् तथा लडियासे हुइना खतरासे जोगेक लाग प्रशासन चौबीसो घण्टा सुरक्षाकर्मीहे उ क्षेत्रमे अनुगमन करना निर्देशनसमेत डेहल जिल्ला प्रशासन कार्यालय डोटी जनैले बा । जिल्लामे लगातार वर्षा हुइटी रहल ओे फेन अन्य छोट लडियामे पानीके बहाव सामान्य अवस्थामे रहल जिल्ला प्रहरी कार्यालय डोटीके प्रमुख प्रहरी उपरीक्षक (एसपी) दानबहादुर मल्ल जानकारी डेलैं ।

वर्षाके कारण यहाँक टमान ठाउँमे पहिरो गैल बा कलेसे एक दजर्नसे ढेर ग्रामीण सडक अवरुद्ध हुइल बा । वर्षा शुरु हुइलसँगे जिल्लाके ग्रामीण भेगके अधिकांश सडक अब्बे सवारी साधन नेंगे नैसेक्ना अवस्थाका हुइल बा ।

वर्षासे हिला हुइल अइसिन सडकमे सवारी साधन नेंग्ना बन्द हुइलसँगे सदरमुकाम कोइ बिरामी परलेसे फेन सदरमुकामके अस्पतालसम लैजाइ सेक्ना अवस्था नैरहल ओ सदरमुकामसँग गाउँघरके सम्पर्कसमेत विच्छेद हुइ लागल जोरायल गाउँपालिका–५ के पूर्णबहादुर विष्ट जानकारी डेलैं ।

ओहोर जिल्लाके जोरायल तथा बिपीनगरमे रहल ठूलीगाडमे समेत पानीके सतह बह्रल ओरसे सतर्क रहन आग्रह करल जोरायल गाउँपालिकाके अध्यक्ष दुर्गादत्त ओझा जानकारी डेलैं । जिल्ला विपद् व्यवस्थापन समितिके अनुसार हालसम पहिरोके कारण जिल्लामे १ जहनके ज्यान गैल बा कलेसे २ बालिका घाहिल हुइल बटैं ।