कैलारीमे स्थापना हुइना १५ शैय्या अस्पतालके डीपीआर सम्पन्न
पहुरा समाचारदाता
हसुलिया, १७ असार । कैलारी गाउँपालिकामे १५ शैय्याके अस्पताल स्थापना हुइना हुइल बा ।
अस्पताल स्थापनाके लाग इहे चालु आवमे अस्पतालके डीपीआर सम्पन्न कैके स्थापनाके लाग संघ सरकारसे अनुरोध करल बा । इहे असार १० गते हुइल गाउँपालिकाके आर्थिक वर्ष २०७८/०७९ के नीति तथा कार्यक्रममे गाउँपालिका अध्यक्ष लाजुराम चौधरी अस्पताल स्थापनाके लाग डीपीआर सम्पन्न कैके अस्पताल स्थापनाके लाग संघ सरकारसे अनुरोध करल बटैलै ।
नीति तथा कार्यक्रम सम्बोधनके क्रममे उहाँ गाउँपालिकामे चालु आर्थिक आवमे स्वास्थ्य क्षेत्रमे उलेख्य काम हुइल ओ द्रुत गतिमे विकास हुइटी रहल बटैलै । गाउँपालिकाके सक्कु वार्डमे स्वास्थ्य चौकी, उपस्वास्थ्य चौकी ओ आधारभूत इकाइ स्थापना हुइल जनाइल बा ।
ओस्टके गाउँपालिकाके प्रत्येक कोनुवामे विरामीसम पुगे सेक्ना मेरके एम्बुलेन्स व्यवस्थापन ओ गेटा आँखा अस्पताल ओ गाउँपालिकाके आपसी सहयोगसे आँखा उपचार केन्द्र स्थापना करल बा ।
यकर साथे गाउँपालिकासे सिकलसेल विरामीहे यातायात खर्च ओ परामर्श केन्द्रके साथे मनोपरामर्श केन्द्र संचालनमे लानल बा ।
