टीकापुर अस्पतालहे २ सय शैय्याके बनैना निर्णय
पहुरा समाचारदाता
टीकापुर, १८ असार । बह्रटी रहल बिरामीके चापसंगे प्रदेश सरकारसे कैलालीके टीकापुर अस्पतालहे २ सय शैय्याके बनैना निर्णय करले बा । शैय्या थपसंगे बिरामी विशेषज्ञ चिकित्सकसे उपचार सेवा पैना टीकापुर अस्पताल विकास समितिके अध्यक्ष दीपक रावल बटैलै ।
प्रदेश सरकारसे उपप्रादेशिक अस्पताल बनैना निर्णय करलेसे फेन इ आर्थिक बरसमे बजेटके व्यवस्था भर करले नैहो । बजेटके लाग प्रदेश सरकारहे घचघच्याइ पर्ना अध्यक्ष रावल बटैलै । बजेट विनियोजन नै हुइलेसे फेन प्रदेश सरकारसे योजना बनाके बजेट डेना हुइल बा ।
टीकापुर अस्पतालके प्रमुख डा. रेमकुमार राई अस्पतालहे उपप्रादेशिक अस्पताल बनैना निर्णयसे खुसी ओ चिन्ता डुनु लागल बटैलै । अस्पतालहे उपप्रादेशिक अस्पताल बनैना निर्णय हुइलेसे फेन इ बरस बजेट विनियोजन नै रहल ओरसे कार्यान्वयन कब हुइना कना चिन्ता रहल उहाँ बटैलै ।
अस्पतालहे उपप्रादेशिक अस्पताल बनैना निर्णय बाहर आइलपाछे सामाजिक सञ्जालमे सक्कु जाने खुसी व्यक्त करले बाटै । अस्पतालके सेवा वृद्धि हुइना हो कलेसे सुदूरपश्चिमके कैलाली ओ बर्दियाके आधा भागके जनता प्रत्यक्ष राहत पैना बाटै ।
टीकापुर अस्पतालमे अब्बे १६ जाने डाक्टर ओ ३३ जाने स्वास्थ्यकर्मी कार्यरत रहल जनाइल बा ।
अस्पतालमे हाडजोर्नी विशेषज्ञ, एमडीजीपी, स्त्रीरोग ओ बालरोग विशेषज्ञ डाक्टर कार्यरत रहल बाटै । २ जाने विशेषज्ञ डाक्टरके मासिक पारिश्रमिक टीकापुर नगरपालिकासे भुक्तानी करटी आइल बा ।
