टीकापुरमे वडा विभाजनमे विवाद
पहुरा समाचारदाता
टीकपुर, १९ असार । कैलालीके टीकापुर नगरपालिका वडा नम्बर १ के वडा विभाजनके लाग राजनीतीक दलबीच हुइल सहमती विवादमे हुइटी गैल बा ।
स्थानीय राजनीतिक दलसे दुई दिनआघे ५ ठो वडा बनैना निर्णय करलेसे फेन उ तीन दिन नैटिकल । राजनीतिक दलसे तीन दिनपाछे ६ ठो वडा बनैना सहमती करले बाटै । कूल ५ वडामे सहमती करल राजनीतिक दलसे वनगाउँके स्थानीय नगरपालिकामे तालाबन्दी करलपाछे सहमती फेरल हो ।
यहोर ६ ठो बनैना सहमती करलपाछे टीकापुरके सक्कु पार्टीके युवाहुक्रे ६ वडाके विरोध कैटी शुकके नगरपालिकामे तालाबन्दी करल रहिट । एमाले नेता श्याम खत्री सबके आअपने समस्या, स्वार्थ, माग ओ बुझाइके कारण राजनीतिक दल निर्णय बदल्न वाध्य हुइल बटैलै ।
‘नगरपालिकामे कौनो फेन दलके बहुमत नैहो, हम्रे राजनीतिक दलहे सहमती कैडेना आग्रह करली,’ नेता खत्री कहलै, ‘सुरुमे ५ वडामे सहमती डेली, फेनसे विवाद हुइल । बिफेक रोज अपने निर्णय बदलके ६ वडा बनैना सहमती कैली मने विवाद ओराइल नैहो । यहाँ सबके स्वार्थ रहल ओरसे समस्या हुइल बा ।’
नेपाली कांगे्रसके क्षेत्रीय सभापति भुवनेश्वर अधिकारी भर वडा विभाजन जैसिन गम्भीर विषयमे आन्तरिक पार्टी ओ अन्तरपार्टीबीच वृहत छलफल हुइ पर्ना रलेसे फेन छलफल विना निर्णय करेबर द्वन्द्व सिर्जना हुइना संकेत डेखल बटैठै । ‘वडा नम्बर १ बरवार वडा हो । विकास निर्माण, सेवा प्रवाहमा समस्या बा । वडा विभाजन आवश्यक ओ गम्भीर विषय हो,’ अधिकारी कहलै, ‘वृहत छलफल विना निर्णय करल ओरसे राजनीतिक दलके निर्णय टिके नैसेकल हो । छलफलसे गैल रहट कलेसे द्वन्द्व सिर्जना हुइना अवस्था नै आइट ।’
वनगाउँके बडघर जीतबहादुर चौधरी कहलै ६ वडा बनैना सहमतीहे स्वागतयोग्य कहटी सबजे समान रुपमे सेवा सुविधा पैना बटैठै । ‘हम्रे माग कैली, राजनीतिक दलसे सच्याइले बाटै,’ चौधरी कहलै, ‘सक्क जानेु समान अवसर पैना वातावरण बनी । ६ वडा कार्यान्वयन हुइ परल ।’
इहीसे आघे ९ वडा किल रहल टीकापुर नगरपालिका राजनीतिक दलसे १५ वडा बनैना सहमती डेले बाटै । राजनीतिक दलसे वडा नम्बर १ हे ६ ओ २ हे २ वडामे विभाजन कैना सहमती डेले बाटै । वडा विभाजनमे सहमती हुइ नैसेकके असार १० गते बैठल बैठक १६ गते बैठलेसे फेन सहमती हुइ नैसेक शनिच्चर १९ गतेके लाग बोलाइल रहे ।
