सिमा समस्या समाधान कैना संघ सरकारसे समन्वय करब : मन्त्री जोशी
कञ्चनपुर, २१ असार । सुदूरपश्चिम प्रदेश सरकारके आन्तरिक मामिला तथा कानून मन्त्री पुर्णा जोशी सिमा समस्या समाधानके लाग संघ सरकारसे समन्वय कैना बटैले बाटी ।
सोम्मारके कञ्चनपुर जिल्ला स्थित भारतसे सिमा जोरल क्षेत्रके अनुगमन तथा निरिक्षण कैटी मन्त्री जोशी जिल्लाके सिमा समस्या समाधानके लाग प्रदेश सरकार संघ सरकारसे समन्वयकारी भुमिका निर्वाह कैना समेत बटैले बाटी ।
कोरोना कालपाछे सिमा क्षेत्रके अवस्था बुझ्न कञ्चनपुर पुगल मन्त्री जोशी सिमाके समस्या प्रदेश सरकारसे किल हल करे नैसेक्ना कहटी ओकर हलके लाग संघ सरकारसे प्रदेश सरकार समन्वय करटी रहल बटैली ।
“भारतसे जोरल टमान क्षेत्रमे सिमा समस्या रहल बा, सिमा समस्याके बारेम सिमामे तारजाली लगाइ परल कना आवाज फेन सुदूरपश्चिम प्रदेश सभामे उठल अवस्था बा ।” कानून मन्त्री जोशी कहली, सिमा समस्याहे हल कैना प्रदेश सरकार संघ सरकारसे समन्वयकारी भुमिकामे रहल बा, आवश्यक निषर्कष निकारके सिमा समस्या हल कैना ओर प्रदेश सरकार लागल बा ।”
ओस्टके जिल्लाके अधिकासं क्षेत्रमे विओपी राखल रलेसे फेन विओपीके व्यवस्थापनके लाग फेन प्रदेश सरकार सहयोग कैना उहाँके कहाइ बा । कञ्चनपुर जिल्लाके गड्डाचौकरी ओ गौरीफन्टा नाकाहे कोरोना माहामारीके जोखिमहे न्युनीकरण करक लाग प्रदेश सरकार थप व्यवस्थित कैना प्रदेश सरकारके योजना रहल उहाँ बटैली ।
कोरोना महामारीके टिसरा लहरहे मध्यनजर कैके ओकर व्यवस्थापनके लाग फेन प्रदेश सरकार आवश्यक समन्वय तथा सहकार्य करटी आइल जनैली । जिल्लामे अब्बे २० स्थानमे विओपी स्थापना हुइल बावै ।
अनुगमनमे मन्त्री जोशीसंगे कृषि तथा सहकारी राज्य मन्त्री मान बहादुर सुनार, भीमदत्त नगरपालिकाके प्रमुख सुरेन्द्र विष्ट, वेदकोट नगरपालिकाके प्रमुख अशोक कुमार चन्द, प्रमुख जिल्ला अधिकारी सहित सरोकारवाला निकायके अनुगमन कार्यक्रममे सहभागिता रहल रहे । इहीसे आघे असार ४ गते मन्त्री जोशी कैलालीसे जोरल गौरीफन्टा नाकाके स्थलगत अनुगमन समेत करल रही ।
