कोरोना संक्रमण फेन बह्रटिः दोसर दिन फेन संक्रमितके संख्या ढेर
काठमाडौं, २२ असार । नेपालमे लगातार दोसर दिन ठिक हुइना संख्यासे नयाँ संक्रमितके संख्या ढेर डेखाइल बा । लम्मा समय ठिक हुइनाके संख्या ढेर रहलमे सोम्मारसे नयाँ संक्रमितके संख्या ढेर डेखाइल हो ।
मंगरके रोज २६३४ जहनमे कोरोनाभाइरसके संक्रमण पुष्टि हुइलमे १५ सय ६५ जाने संक्रमणमुक्त हुइल बटैं । १२ हजार ५८५ जहनके परीक्षणके पीसीआर विधिसे १७१८ जाने तथा एन्टिजेन विधिसे ९१६ जहनमे संक्रमण पुष्टि हुइल हो ।
सोम्मार स्वास्थ्य तथा जनसंख्या मन्त्रालयके अनुसार पीसीआर विधिसे ७ हजार ४९९ ओ एन्टिजेन विधिसे ४ हजार २८ जहनमे परीक्षण करलमे २६२२ जहनमे संक्रमण पुष्टि हुइल रहे । यिहे अवधिमे थप २२११ जाने कोरोना संक्रमणमुक्त हुइल रहैं ।
अस्टेक थप १५ जहनमे कोभिड–१९ के संक्रमणसे मृत्यु हुइल बा । नेपालमे हालसम ९ हजार २६३ जाने ज्यान गुमासेकल बटैं ।
हाल २२ हजार ९६९ जाने होमआइसोलेसनमे बटैं कलेसे २ हजार ५९ जाने संस्थागत आइसोलेसन, आईसीयूमे ५६७ ओ भेन्टिलेटरमे १७१ जाने रहल बटैं ।
