थप २,६७६ जनहनमे कोरोना संक्रमण, ३३ जनाके मृत्यु
काठमाण्डौं, ३१ असार । पाछेक २४ घण्टामे थप २,६७६ जनहनमे कोरोना भाइरस संक्रमण पुष्टि हुइल बा ।
स्वास्थ्य तथा जनसंख्या मन्त्रालयके अनुसार ८२५६ पीसीआर परीक्षणमे १७८२ ओ ४५१२ एन्टिजेन परीक्षणमे ८९४ जाने कैके २६७६ जनहनमे संक्रमण पुष्टि हुइला हो । कोरोना संक्रमणसे थप ३३ जनहनके मृत्यु हुइल बा कलेसे १७५७ जाने संक्रमणमुक्त हुइल बाटै ।
सक्रिय संक्रमित २६ हजार ६३९ जाने मध्ये होम आइसोलेसनमे २४ हजार २५ जाने रहल बाटै कलेसे अस्पतालमे दुई हजार ६ सय १४ जाने रहल बाटै ।
सेती अस्पताल प्रयोगशाला परीक्षणमे १९ जनहनमे कोरोना पुष्टि
सेती प्रादेशिक अस्पतालके प्रयोगशालामे करल परीक्षणमे १९ जनहनमे कोरोना भाइरसके संक्रमण पुष्टि हुइल बा । पाछेक २४ घण्टामे अस्पतालके प्रयोगशालामे ६५ नमूनाके परीक्षण करेबर १९ जनहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलै ।
ओहकान अनुसार हाल अस्पतालमे १७ जाने संक्रमित उपचाररत रहल बाटै । जौनमध्ये २ जाने संक्रमित आईसीयूमे उपचाररत रहल बाटै । ओस्टके २ जाने संक्रमित चोखाके घर गैल बाटै कलेसे थप ५ बिरामी अस्पतालमे भर्ना हुइल बाटै ।
