भारतीय पक्षके संलग्नता डेखगैल छानबिन समितिके निचोड
पहुरा समाचारदाता
धनगढी, २ भदौ । दार्चुलाके तुइन घटनामे भारतीय पक्षके संलग्नता डेखगैल छानबिन समिति निचोड निकरले बा ।
भारतीय पक्षसे तुइनके लट्ठा खुस्का डेहल ओरसे व्यास गाउँपालिका–२, मालगाउँके ३३ वर्षीय जयसिंह धामी महाकाली लडियामे गिरके बेपत्ता हुइल निष्कर्ष निकारल हो ।
घटनाके छानबिनके लाग गठित सरकारी समितिसे करिब दुई साताके छानबिनपाछे समिति प्रतिवेदन लेखनमे जुटल बा । मालघाट–गस्कु जोर्ना तुइन नाघके धामी उपार जाइबर गत सावन १५ मे भारतीय सशस्त्र सीमा बल (एसएसबी) लट्ठा खुस्का डेहल रहिट ।
गृह मन्त्रालयके सहसचिव जनार्दन गौतम संयोजक रहल छानबिन समितिसे घटनाके स्थलगत निरीक्षण, अवलोकन, अनुसन्धान ओ प्रत्यक्षदर्शीसंगके सोधपुछ एवं बयानके आधारमे भारतीय पक्षसे तुइनके लट्ठा खुस्काइल कारण लडियामे गिरके बेपत्ता हुइल निष्कर्ष निकारल हो । अइसीन घटना दोहरे नैडेना तुइन विस्थापन तथा पक्की पुल बनाके आउजाउ सहज बनैना, नेपालओरके भूभागसे सहज डगरा निर्माण करे पर्ना सुझाव फेन प्रतिवेदनमे समेटे लागल बा ।
छानबिन समितिसे इहीहे नै प्रमुख आधार बनाके सरकारहे रायसुझाव सहितके प्रतिवेदन बुझैना तयारी करले बा । घटना हुइबर मालघाटमे रहल नेपाली प्रत्यक्षदर्शीहुक्रे एसएसबीके जवान तुइनके लट्ठा काटलपाछे धामी भेलमे गिरल बटाइल रहिट । धामी बेपत्ता हुइल परौक रोज सावन १७ मे सहसचिव गौतमके संयोजकत्वमे नेपाल प्रहरीके सुदूरपश्चिम प्रदेश प्रमुख डीआईजी पुरुषोत्तम कँडेल, राष्ट्रिय अनुसन्धान विभागके अनुसन्धान निर्देशक हुतराज थापा, सशस्त्र प्रहरीके एसएसपी सुरेशकुमार श्रेष्ठ ओ जिल्ला प्रशासन कार्यालय, दार्चुलाके सहायक प्रमुख जिल्ला अधिकारी ज्योत्सना भट्ट जोशी सम्मिलित पाँच सदस्यीय समिति गठन कैके १० दिनभित्रे प्रतिवेदन पेस कैना कहल रहे ।
सहसचिव गौतम नेतृत्वके सुरक्षा टोली सावन १९ गते दार्चुला सदरमुकाम खलंगाहे मुकाम बनाके अनुसन्धानमे जुटल रहे । उहे क्रममे धामीके खोजीमे प्रहरी प्रधान कार्यालयसे ड्रोनसहितके प्राविधिक टोली घटनास्थल पुगल रहे । टोलीहे महाकाली लडियाके डुनु देशके किनारासे ड्रोनसहित खोजबिनमे परिचालन कैना योजना भारतीय असहयोगके कारण पूरा हुइ भर नैपाइल ।
दार्चुलाके सहायक प्रमुख जिल्ला अधिकारी ज्योत्सना भट्ट जोशीके अनुसार सावन २३ मे महाकाली लडियाउपार किनारेकिनार ड्रोन उडैना पिथौरागढस्थित जिल्लाधिकारीहे पठाइल पत्रके जवाफ अब्बेसम आइल नैहो । समिति संयोजक गौतम कुछ दिनआघे दार्चुलासे स्थलगत निरीक्षण एवं प्रमाण संकलन कैके काठमाडौं जासेकल बाटै ।
समितिके अन्य सदस्य फेन कुछ दिनभित्रे काठमाडौं जैना तयारीमे रहल जनाइल बा । सुरुके १० दिन ओ ओकरपाछे थप करल एक साताके समय अपुग होके प्रतिवेदन बुझैना समय पुनः एक साता थप करल रहे । गृहमन्त्री बालकृष्ण खाँण बुधके लागू हुइना मेरके समितिके म्याद डुसरचो फेन एक साता थपल हुइट ।
सावन १५ गते व्यास गाउँपालिका–२, मालघाटमे स्थानीय ३३ वर्षीय जयसिंह धामी भारतके डगरा हुइटी जिल्ला सदरमुकाम खलंगा जैना क्रममे तुइनसे महाकाली लडिया नाघेबर भारतीय सीमा सुरक्षा बल (एसएसबी) तुइनके डोरी काटडेहलपाछे महाकाली ललडियामे डुबके बेपत्ता हुइल हुइट । तुइनसे गिरके बेपत्ता हुइल धामी आभिन भेटल नैहुइट ।
