कोरोनाके संक्रमण दर बह्रटी
प्रदेशमे सावन महिनामे किल हजारसे ढिउरहे संक्रमण
पहुरा समाचारदाता
धनगढी, ३ भदौ । सुदूरपश्चिम प्रदेशमे सावन महिनामे एक हजार ३३२ जाने नयाँ कोरोना संक्रमित थपल बाटै ।
सावन ३२ गते सोम्मारके प्रदेशमे ४० जाने कोरोना संक्रमित थपल संगे सावन महिनामे एक हजार ३३२ जाने नयाँ संक्रमित पुगल हुइट । सोम्मारके एन्टिजेन विधिसे परीक्षण करल ६८० मध्ये १० जनहनमे ओ पीसीआर विधिसे परीक्षण करल २२५ जाने मध्ये ३० जनहनमे कोरोना संक्रमण पुष्टि हुइल हो । प्रदेश स्वास्थ्य निर्देशनालयसे सोम्मारके सार्वजनिक करल विवरण अनुसार सावन महिनामे एन्टिजेन विधिसे १७ हजार ९६७ जनहनके परीक्षण करल रहे । उ मध्ये ३३७ जनहनमे संक्रमण डेखल हो ।
ओस्टके सावनमे पीसीआर विधिसे पाँच हजार ७९ जनहनके स्वाब परीक्षण करल रहे । पीसीआर विधिसे परीक्षण करल मध्ये ९९५ जनहनमे कोरोना संक्रमण पुष्टि हुइल प्रदेश स्वास्थ्य निर्देशनालयके तथ्यांकमे उल्लेख रहल बा ।
तथ्यांक अनुसार सुदूरपश्चिममे सावन महिनामे ६ जाने कोरोनाविरुद्धके लडाइमे ज्यान गुमैले बाटै । ज्यान गुमुइयनके पीसीआर विधिसे परीक्षण करेबर संक्रमण पुष्टि हुइल रहे ।
यहोर प्रदेश स्वास्थ्य निर्देशनालयके तथ्यांक अनुसार सावन महिनासम सुदूरपश्चिम प्रदेशमे ४५ हजार ७५७ जानो संक्रमण डेखगैल बा । हालसम एन्टिजेन विधिसे परीक्षण करल ९९ हजार ९७८ मध्ये नौ हजार ८७ जनहनमे संक्रमण डेखल बा । इ संख्या कुल परीक्षण करल व्यक्तिहुक्रनके संख्याके नौ प्रतिशत हुइ आइठ् ।
ओस्टके पीसीआर विधिसे परीक्षण करल दुई लाख नौ हजार ७८ मध्ये ३६ हजार ६७० जनहनमे कोरोना संक्रमण पुष्टि हुइल बा । इ संख्या पीसीआर विधिसे परीक्षण करल कुल संख्याके १८.२४ प्रतिशत हो ।
सुदूरपश्चिममे हालसम ५८० जाने कोरोनासे ज्यान गुमा सेकल बाटै । इ मध्ये पीसीआर विधिसे संक्रमण पुष्टि हुइल ३३५ ओ एन्टिजेन विधिसे संक्रमण पुष्टि हुइल २४५ रहल बाटै । सावनसमके तथ्यांक अनुसार सुदूरपश्चिममे ४११ नाने सक्रिय संक्रमित रहल बाटै ।
प्रदेशमे हालसम पुष्टि हुइल कुल संक्रमितमध्ये ४५.७७ प्रतिशत २० से ३९ बरस उमेर समूहके रहल बाटै । प्रदेश स्वास्थ्य निर्देशनालयके तथ्यांक अनुसार सावन मसान्तसम पुष्टि हुइल कुल संक्रमित ४५ हजार सात सय ५७ मध्ये २० हजार ९६० उ उमेर समूहके रहल बाटै । यम्ने फेन २० से २९ बरस उमेरके संक्रमितहुक्रनके संख्या ढिउर डेखजाइठ् । इ उमेर समूहके सात हजार आठ सय १३ पुरुष ओ तीन हजार सात सय २६ महिला कैके ११ हजार पाँच सय ३९ संक्रमित रहल बाटै । इ संख्या प्रदेशके कुल संक्रमित संख्याके २५.२१ प्रतिशत हुइ आइठ् ।
टिसरा भेरियण्टके संक्रमण फैल्ना खतरा रहलेसे फेन सावधानी नैरहल प्रदेश स्वास्थ्य निर्देशक डा गुणराज अवस्थी बटैठै । ‘न मास्क लगैठै, न भौतिक दुरी हो,’ डा अवस्थी कहलै, ‘पहिल लहरके संक्रमण फैलेबर कुछ डर रहे सर्वसाधारणमे मने अब्बे ओइसीन नैडेखजाइठ् ।’ उहाँ कोरोना महामारीके बारेमे मजासे बुझल व्यक्ति समेत समेत लापरबाही कैना करल बटैलै ।
टिसरा लहरके संक्रमण रोकथामके लाग पूर्व तयारी हुइटी रहल डा अवस्थी बटैलै । ‘कैलाली ओ कञ्चनपुरमे एक÷एक हजार शैयाके होल्डिङ सेन्टर निर्माण हुइटी बा,’ उहाँ कहलै, ‘उ सेण्टर निर्माण हुइलपाछे भारतसे अउइयाहुक्रनहे सीमा नाकामे परीक्षण कैना ओ संक्रमित डेखगैलेसे होल्डिङ सेण्टरमे राखके चोखैलेसे किल घर पठैबी ।’
उहाँ प्रदेशभिट्टर रहल अस्पतालके फेन स्तरोन्नति कैना तयारी हुइटी रहल बटैलै । प्रत्येक जिल्ला अस्पतालमे भेन्टिलेटर सञ्चालनके लाग आवश्यक जनशक्ति व्यवस्थापन कैना योजना रहल डा अवस्थी बटैलै । उहाँ कहलै, ‘सम्बन्धित जिल्ला अस्पतालमे काम करुइया एक जाने डाक्टर ओ एक नर्सहे तालिम डेके भेन्टिलेटर चलाइ सेक्नहा बनैना तयारी रहल बा ।’
तीन तहके सरकारबीच समन्वय नैहुइल कारण स्वास्थ्य क्षेत्रमे काम कैना समस्या हुइटी रहल अवस्थीके बुझाइ रहल बा । उहाँ कहलै, ‘चेन अफ कमान नैहुइल, जिम्मेवारी निर्वाह कैनासे फेन पन्छना काम हुइठ् ।’
कोरोनाके संक्रमणसे बचक लाग सुरक्षित रहना ओ स्वास्थ्य सुरक्षाके मापदण्डके पूर्ण रुपमे पालना कैना डा अवस्थी सक्कु जनहनहे आग्रह करलै ।
