निसर्गमे ६ महिनामे ९० जहनके न्युरो सर्जरी
पहुरा समाचारदाता
धनगढी, १३ भदौं । धनगढीमे रहल निसर्ग हस्पिटल एण्ड रिसर्च सेन्टर ६ महिनामे ९० जाने बिरामीहुकनके न्युरो सर्जरी करले बा । गैल फागुन १० गतेसे न्युरो सर्जरी (नशा रोग शल्यक्रिया) सेवा सुरु करले रहे ।
सेवा सुरु करल कुछ समयमे ६५ जहनके जटिल शल्यक्रिया (मेजर अप्रेसन) सेवा प्रदान करले बा कलेसे २५ जहनके सामान्य शल्यक्रिया करल अस्पतालके अध्यक्ष तीर्थराज पन्त बटैलैं ।
न्यूरो सर्जन डाक्टर सुरेश सापकोटा हस्पिटसँग जोरलसँगे नशा सम्बन्धी शल्यक्रिया सेवा सुरु हुइल रहे । दुई वर्ष उमेर समूहसे लेके ७५ वर्ष उमेरके बिरामीसमके अप्रेशन करल डाक्टर सापकोटा बटैलैं ।
निसर्ग हस्पिटल यी सेवा सुरु करनासे पहिले सुदूरपश्चिम प्रदेशमे यी स्तरके सेवा उपलब्ध नैरहे । गण्डकी मेडिकल कलेज, पोखरामे कार्यरत रहल चिकित्सक सापकोटा निसर्ग हस्पिटलमे आइलसँगे उ सेवा सुरु करल हो ।
फागुनसे निसर्ग हस्पिटलमे न्युरो सर्जन सापकोटा आइलबाद कपार ओ नशामे समस्या रहल यी क्षेत्रके बिरामी धनगढीमे उपचार पैले बटैं । अस्पताल यी सेवा सुरु करलपाछे न्युरो सम्बन्धि बिरामी बाहेर जाइपरना अवस्था कम हुइल हस्पिटल जनैले बा ।
हस्पिटल नवजात शिशु तथा बालरोग, स्त्री तथा प्रसूति रोग, न्युरो मस्तिस्क, नशा तथा मेरुदण्ड रोग, छाला यौन कुष्ठरोग तथा सौन्दर्ग सेवा, हाडजोर्नी तथा नसा रोग, जनरल सर्जरी, जनरल मेडिसिन, मानसिक रोग, बालरोग, मुख अनुहार तथा बंगारा रोग, आईसीयू, एनआईसीयू, रेडियोलोजी, एनेस्थेसिया सेवा प्रदान करटि आइल बा ।
