स्वास्थ्य बिमा करुइया नागरिकके संख्या न्यून
धनगढी, १५ भदौ । ६ वर्षआघे कैलाली सहित देशके तीन जिल्लासे शुरु हुइल स्वास्थ्य बिमा कार्यक्रम सुदूरपश्चिममे प्रभावकारी हुइ सेकल नैहो ।
सरकार निःशुल्क औषधी उपचारके घोषणासंगे आर्थिक अभाव वा समयमे उपचार नैपाके अकालमे नागरिक ज्यान गुमाइ नापरे कना उद्देश्यसे २०७२ सालमे कैलाली, ईलाम ओ बागलुङसे स्वास्थ्य बिमा कार्यक्रम शुरु करले रहे ।
देशमे पहिल चरणमे स्वास्थ्य बिमा शुरु करल कैलाली जिल्लामे स्वास्थ्य बिमा कार्यक्रममे समेटल नागरिकके संख्या न्यून बा । कञ्चनपुरके अवस्था फेन कैलालीके से फरक नैहो । स्वास्थ्य बिमा बोर्ड शाखा कार्यालय सुदूरपश्चिमके अनुसार २५ लाख ५२ हजार ५ सय १७ जनसंख्या रहल सुदूरपश्चिममे स्वास्थ्य बिमा करना संख्या ३ लाख ७८ हजार ७ सय ९० जाने किल स्वास्थ्य बिमा करले बटैं ।
सुदूरपश्चिममे स्वास्थ्य बिमा करल सबसे ढेर नागरिक कैलालीमे बटैं । स्वास्थ्य बिमा बोर्ड शाखा कार्यालय सुदूरपश्चिम प्रदेशके अनुसार कैलालीमे १ लाख ९६ हजार ४ सय ओ कञ्चनपुरमे ३२ हजार ८ सय ८० जाने स्वास्थ्य बिमा करले बटैं ।
