रोहित ओ सोमपालके अर्धशतकीय साझेदारीसे नेपाल विजयी

काठमाडौं, २२ भदौ । नेपाल एकदिवसीय अन्तर्राष्ट्रिय क्रिकेटमे पपुवा न्यु गिनी(पीएनजी)हे २ विकेटसे पराजित करले बा । पीएनजीसे डेहल १३५ रनके लक्ष्य नेपाल ६३ बल अगावे पूरा करल हो ।

ब्याट्सम्यान रोहित पौडेल ओ सोमपाल कामीके उत्कृष्ट साझेदारीसे नेपाल जित निकारल हो । ओपनरद्वय कुशव भुर्तेल ओ आसिफ शेखके साझेदारी मजा हुइलेसे फेन उपाछे आइल अन्य ब्याट्सम्यान मजा प्रदर्शन करे नैसेक्लैं । ८२/७ के अवस्थामे पुगल बेला सोमपाल रोहितहे साथ डेहे मैदान प्रवेश करले रहैं । रोहित ६५ बलमे ४१ रन जोरके आउट हुइल रहैं कलेसे सोमपाल अविजित रहिके ३२ बलमे २२ रन बनैलैं ।

कुशल भुर्तेल ओ आसिफ शेख क्रमशः १५ ओ ३० रन बनाके आउट हुइल रहैं । अस्टेक कप्तान ज्ञानेन्द्र मल्ल ६ रनमे आउट हुइल रहैं । आरिफ शेख ९ ओ शरद भेषावकर ६ रनमे आउट हुइलैं । अस्टेक कुशल मल्ल १ रनमे आउट हुइलैं । पवन सर्राफ भर शून्यमे आउट हुइलैं ।

पीएनजीके लाग डेमन राबू, चाल्र्स अमिनी ओ चाड सोपर ओ गौडी टोका २/२ विकेट लेनैं । अस्टेक, नोसैना पोकना १ विकेट लेनैं । यीआघे टस जितके पहिले ब्याटिङ करल पपुवा न्यु गिनी ३३ ओभरमे सब विकेट गुमाके १३४ रन बनैले रहे ।

नेपालके लाग सन्दीप लामिछाने सर्वाधिक ४ विकेट लेले रहैं ।