कैलाली बहुमुखी क्याम्पसमे ताला बन्दी
पहुरा समाचारदाता
धनगढी, २३ भदौ । धनगढीस्थित कैलाली बहुमुखी क्याम्पसमे फेनसे तालाबन्दी करल बा । बीएएलएलबीके विद्यार्थीसे करल तालाबन्दीके घटना नैसराइ पैटी बुधके फेनसे तालाबन्दी करल हो । बीबीएस चौथो बरसमे अधयनरत विद्यार्थीहुक्रे क्याम्पसमे तालाबन्दी करल हुइट ।
उहाँहुक्रे क्याम्पस प्रमुख, प्रशासन लगायत परीक्षा फाँटमे ताला लगाइल बटैले बाटै । चारबुँदे माग रख्टी ज्ञापन पत्र बुझाइलमे माग सम्बोधन नैहुइल कहटी तालाबन्दी करल उहाँहुक्रे जनैले बाटै ।
उहाँहुक्रनसे राखल मागमे कम्तीमे ४ दिन भित्रे क्याम्पसमे पठनपाठन सुरु हुइ पर्ना ओ स्वास्थ्यके सक्कु मापदण्ड अनिवार्य रुपमे अपनाइ पर्ना, अनलाइन कक्षा प्रभावकारी रुपमे सञ्चालन नैहुइल ओ ढिउर विद्यार्थी उक्त कक्षासे पठनपाठनसे वञ्चित रहल ओरसे ४० प्रतिशत शुल्क मिनाहा करे पर्ना, कोभिड १९ से उत्पन्न परिस्थितिसे विद्यार्थीनमे परे गैल नकरात्मक असरहे न्यूनीकरणके लाग उत्प्रेरणात्मक कक्षाके व्यवस्था कैना, अनलाइन कक्षा लेनासे वञ्चित विद्यार्थीके लाग अतिरिक्त कक्षाके व्यवस्था करे पर्ना लगायतके माग रहल बा ।
विद्यार्थीनसे तालाबन्दी करलपाछे क्याम्पस क्षेत्रमे तनाव उत्पन्न हुइल बा कलेसे क्याम्पसके काम प्रभावित बनल बावै ।
