सेतीमे प्रादेशिक अस्पतालके चेकजाँचमे ३८ संक्रमित ठप्लै
पहुरा समाचारदाता
धनगढी,२ कुवाँर । सेती प्रादेशिक अस्पताल धनगढीमे पछिल्का २४ घण्टामे करल आरटी पिसिआर जाँचमे ठप ३८ जनहनमे कोरोना संक्रमण डेखल बा ।
पछिल्का २४ घण्टामे ७६ जानेक पिसिआर स्वाव संकलन करके चेकजाँच करेबेर ३८ जानेकमे संक्रमण डेखल ओ ३८ जानेक निगेटिभ रिपोर्ट आइल सेती प्रादेशिक अस्पताल जनैले बा । सेती प्रादेशिक कोरोना अस्पतालमे अब्बे १६ जाने संक्रमितके उपचार हुइटी रहल बा कलेसे पछिल्का २४ घण्टामे ठप दुई जाने लौवा विमारी भर्ना हुइल बटै ।
ओम्नेसे ७ जाने आइसियूमे, ४ जाने भेन्टिलेटरमे बटै । पछिल्का २४ घण्टामे ३ जाने ठिक हुके होम आइसोलेशनमे गैल अस्पताल जनैले । सेती प्रादेशिक अस्पतालमे हालसम १४ सय ९३ जाने कोरोना संक्रमित भर्ना हुइलमे ठिक हुके गैल ओ होम आइशोलेशनमे गैल विमारीके संख्या १२ सय ८८ रहल जनागिल बा । कलेसे हालसम १ सय ९२ जाने विमारीके ज्यान गैल बा ।
सेती प्रादेशिक अस्पालमे जनरल वेड ४०, आइसियू वेड १६, एचडियू बेड ५, इमरजेन्सी बेड १८ ठो रहल बा । सेती प्रादेशिक अस्पतालके पिसिआर प्रयोगशालामे १ लाख १४ हजार ३२८ जानेक पिसिआर स्वाव संकलन करके चेकजाँच करेबेर २० हजार ४३९ जानेक पोजेटिभ ओ ९३ हजार ८८९ जानेक निगेटिभ रिपोर्ट आइल रहे ।
