धुरझन्नामे निःशुल्क आँखा जाँच शिविर, ३ सयसे ढिउरके आँखी परिक्षण
पहुरा समाचारदाता
धनगढी, ६ कुँवार । धनगढी उपमहानगरपालिका–१७ धुरझन्नाके स्थानीय अपने गाउँमे आँखीक उपचार पाइबर खुशी हुइल बाटै ।
बुधके आयोजना करल एक दिने निःशुल्क आँखी शिविरमे आँखीके उपचार पाके खुशी हुइल हुइट । गाउँमे आके स्वास्थ्यकर्मी आँखीके परीक्षण कैनाके साथे निःशुल्क औषधि वितरण करलपाछे खुशी लागल स्थानीय चक्रबहादुर चौधरी बटैलै ।
‘यहाँ उपचार कराइ पाके धनगढी वा गेटा जाइ नैपरल’, उहाँ थप्लै । ‘यहाँ औषधि ओ किहुहे चश्मा फेन मिलल् बा ।’
धनगढी उपमहानगरपालिका, चौधरी फाउण्डेशन, लायन्स क्लब अफ धनगढी एभ्रेष्ट ओ च्यारिटी फाउण्डेशनके आयोजनामे निःशुल्क आँखी शिविर आयोजना करल हो । शिविरमे प्राविधिक सहयोग धनगढी नेत्रालय करल रहे ।
शिविरमे २२० जाने महिला ओ १२० जाने पुरुष कैके ३४० जनहनके आँखीके परीक्षण करल ओ सक्कु जनहनहे निःशुल्क औषधि फेन डेहल चौधरी ग्रुपके सुदूरपश्चिम प्रदेश प्रशासक स्माइल चौधरी जानकारी डेलै । ओहकान अनुसार परीक्षण करल मध्ये ६० जनहनमे मोतिबिन्दु डेखल ओरसे अपरेशनके लाग सिफारिस करल बा ।
धनगढी नेत्रालयमे उहाँहुक्रनके निःशुल्क शल्यक्रिया हुइना जनाइल बा । ओस्टके, लग्गे हेर्ना समस्या रहल ७१ जनहनहे शिविर स्थानमे निःशुल्क चश्मा प्रदान करल बा ।
शिविरमे वडा नम्बर १७ के पथरी लगायत औरे गाउँके स्थानीय समेत आँखीक उपचार कराइल रहिट ।
निःशुल्क आँखी शिविरमे धनगढी नेत्रालयके दृष्टि विशेषज्ञ आशिष पाण्डेयके नेतृत्वमे प्राविधिकहुक्रनके टोलीसे आँखी परीक्षण करल रहे । ओस्टके, नेत्र सहायक नरेश चौधरी, मेलिना मडै, दीक्षा जोशी, संगीता बम, अप्टिकल सहायक हेमा चन्द सेवा प्रदान करल शिविर संयोजक त्रैलोक्यनाथ पाण्डेय जानकारी डेलै ।
निःशुल्क आँखी शिविरमे धनगढी उपमहानगरपालिकाका प्रमुख नृपबहादुर वड, वडा नम्बर १७ के वडा अध्यक्ष माधवराज राना लगायतके उपस्थिति रहल रहे । उ क्रममे नगर प्रमुख वड धनगढी उपमहानगरपालिकाके औरे वडामे फेन निःशुल्क आँखी शिविर सञ्चालन कैना बटैलै ।
