१७३ ठाउँमे विशेष टोली, कुक्कुर ओ ड्रोनसे निगरानी
पहुरा समाचारदाता
धनगढी, ८ कुँवार । कैलाली प्रहरीसे डसैं, डेवारी ओ छठ पर्वहे लक्षित कैके विशेष सुरक्षा योजना लागु करले बा ।
इ टरटिहारके बेला हुइ सेक्ना सम्भावित घटना तथा दुर्घटनाहे ध्यानमे राखके विशेष सुरक्षा योजना बनैटी जिल्लाभर लागु करल जिल्ला प्रहरी कार्यालय जनैले बा ।
जिल्ला प्रहरी कार्यालयके प्रमुख प्रहरी उपरीक्षक (एसपी) विश्व अधिकारी डसै, डेवारी ओ छठके बेला हुइ सेक्ना चोरी, डकैती, ठगी लगायतके अपराधिक गतिविधिहे ध्यान डेटी सुरक्षा योजना लागु करल जानकारी डेलै । कैलाली जिल्लाहे दुई भागमे विभाजन कैटी एकीकृत सुरक्षा योजना बनाइल ओ एक सय ७३ स्थानमे विशेष टोली परिचालन करल उहाँ बटैलै ।
प्रहरीसे त्रिनगर भन्सार नाकासे टीकापुरसम टमान स्थानमे नागरिक सहायता कक्ष स्थापना कैना, राजमार्ग क्षेत्रमे रिफ्रेस सेन्टर स्थापना कैना, राजमार्ग क्षेत्रमे सरप्राइज चेकिङ कैना, स्थानीय प्रशासनसंगके समन्वयमे बजार अनुगमन कैना विषयहे समेत सुरक्षा योजनामे समेटल बा । टरटिहारके बेला सीमा नाका ओ बैंक तथा वित्तीय संस्था रहल स्थानहे लक्षित कैटी कडाइके नीति लेहल प्रहरी जनैले बा ।
सीमे नाकामे यात्रु ठग्वा पैना तथा लागुऔषध, विस्फोटक पदार्थ जैसिन वस्तु ओसारपसार हुइ सेक्ना हुइल ओरसे कुक्कुर कुकुर समेत परिचालन कैना योजना बनाइल एसपी अधिकारी बटैलै ।
ड्रोन मार्फत समेत जिल्लाभर निगरानी बह्रटी शान्ति सुरक्षा कायम कैके शान्ति पूर्वक तरिकासे टरटिहार मनैना वातावरण सिर्जना कैना प्रहरी जनैले बा । सवारी दुर्घटना न्यूनीकरणके लाग चिसापानीसे अत्तरिया ओ अत्तरियासे फल्टुडेसम टाइम कार्ड लागु कैना प्रहरी जनैले बा ।
चाडपर्वमे हुइ सेक्ना अवान्छित गतिविधि नियन्त्रणसंगे कोभिडके महामारीहे ध्यानमे राखके स्वास्थ्य सुरक्षाके मापदण्डके पालनामे फेन कडाइ करजैना बा । टरटिहारके बेला कैलाली जिल्लाभर झण्डे साढे ७ सय प्रहरी परिचालन कैना बटैटी प्रमुख प्रहरी उपरीक्षक अधिकारी उहे हाराहारीमे सशस्त्र प्रहरी फेन परिचालन हुइना बटैलै ।
