निःशुल्क स्वास्थ्य शिविरके १५० जाने सेवा लेलै

पहुरा समाचारदाता
हसुलिया, १० कुवाँर । महिलाहुक्रनमे १० बरस पाछेसम डेखे सेक्ना सम्भावित पाठेघरके मुहके क्यान्सर परिक्षण हसुलिया स्वास्थ्य चौकीमे हुइल निःशुल्क शिविरमे १ सय ५० जाने सेवा लेले बटै ।

कैलारी गाउँपालिका स्वास्थ्य शाखाके आयोजना तथा ओरेक नेपालके आर्थिक सहयोग ओ नेपाल परिवार नियोजन संघ कैलालीके प्राविधिक सहयोगमे अँट्वारके हुइल उ शिविरमे सेवा लेहल मन्से ५६ जाने महिलाके पाठेघर समस्याके चेकजाँच हुइल ओरेक नेपाल कैलालीके कैलालीके कार्यक्रम संयोजक गीता चौधरी बटैली ।

ओम्ने मन्से १ जनेकमे रिङपेसरी दारल ओ ४ जानेक पाठेघर बाहेर निकारल ओरसे अप्रेशनके लाग सेती प्रादेशिक अस्पतालमे रेफर करल उहाँ जर्नैली । स्त्रीरोग विशेषज्ञहुक्रनसे खास कैके महिलाहुक्रनमे डेख जैना टमान स्वास्थ्य समस्याबारे चेकजाँच करल कार्यक्रम संयोजक जनैली ।
शिविरमे महिलाके पाठेघरके मुखके क्यान्सर परिक्षण, महिलाहुक्रनमे डेखजैना टमान मेरिक यौन संक्रमण सम्बन्धी परिक्षण, सल्लाह एवं लाक्षणिक उपचार सेवा, पाठेघर गिरल महिलाहुक्रनके स्क्रिनिङ तथा रिंगपेसरी सेवा, परिवार नियोजन सम्बन्धी परामर्श तथा आइयूसीडी ओ इमप्लान्ट सहित अस्थायी साधन सेवा बारे सल्लाह सुझाव डेहल रहे ।

एक दिने निःशुल्क एकिकृत स्वास्थ्य शिविरके उदघाटन कार्यक्रम गाउँपालिका उपाध्यक्ष लक्ष्मी सत्गौवाथारुके वडका पहुनामे हुइल रहे । उहाँ व्यानर पह्रके शिविरके उदघाटन करल रहिट ।
कार्यक्रम कैलारी गाउँपालिका स्वास्थ्य शाखाके विरेन्द्र सापकोटा, ओरेक नेपाल केन्द्रीय कार्यालयके इलावत्ती केसी लगायतके उपस्थिती रहे । उहे अवसरमे सयपैत्री बातचित अन्र्तगत १५० जनहनहे लैङिक हिंसा, महिला ंिहसाके कारण स्वास्थ्यमे पारल असरबारे सामुहिक अभिमुखीकरण करल रहे ।

निःशुल्क शिविरमे कैलारी गाउँपालिकाके ६ ओ ९ बाहेक सक्कु वडाके महिला सेवा लेहे आइल रहिट । कलेसे गौरीगंगा नगरपालिका ११ के महिलाफे सेवा लेहे आइल रहिट ।
महिला रोग विशेषज्ञ डा. प्रतिक्षा सिंह राठौर निशुल्क शिविरमे सेवा लेहे आइल महिलनमे उज्जर पानी बहना, यौनी चिलैना, महिनावारी गडवडी समस्या डेखल बटैली ।