थप ८९२ जहनमे कोरोना पुष्टि, आठ जहनके मृत्यु
काठमाडौं, १३ कुँवार । बिटल २४ घण्टामे नेपालमे ८९२ जहनमे कोरोना भाइरस संक्रमण डेखाइल बा । स्वास्थ्य मन्त्रालयके अनुसार १० हजार ६५२ पीसीआर परीक्षणमे बुधके रोज थप ८९२ जहनमे संक्रमण पुष्टि हुइल हो ।
यी सँगे नेपालमे कोरोना भाइरससे संक्रमित हुइनाके संख्या ७ लाख ९४ हजार १६१ पुगल बा । अस्टेक एन्टिजेन विधिसे करल ३ हजार ८८९ परीक्षणमे २६५ जहनमे पोजिटिभ डेखाइल बा ।
२४ घण्टामे पीसीआर ओ एन्टिजेन विधिसे करल १४ हजार ५४१ परीक्षणमे १ हजार १५७ जहनमे संक्रमण पुष्टि हुइल मन्त्रालय जनैले बा ।
बिटल २४ घण्टामे थप १ हजार ११३ जाने संक्रमणमुक्त हुइल बटैं । हालसम ठिक हुइनाके संख्या ७ लाख ६४ हजार ८४७ रहल बा । नेपालमे कोरोना संक्रमणसे थप ८ जहनके मृत्यु हुइल बा । हालसम कोरोनासे मृत्यु हुइनाके संख्या ११ हजार १२३ पुगल बा ।
हालसम देशभर ४१ लाख ९६ हजार ८२७ नमुनाके पीसीआर परीक्षण हुइल बा । क्वारेन्टाइनमे २४४ जाने रहल बटैं कलेसे आइसोलेसनमे १८ हजार १९३ जाने बटैं । मन्त्रालयके अनुसार बिटल २४ घण्टामे पूर्ण खोप प्राप्त करनाके संख्या २ लाख ८६ हजार १४५ पुगल बा ।
