अलकोहलके प्रत्यक्ष असर महिला तथा बालबालिकामे

पहुरा समाचारदाता
धनगढी, १४ कुवाँर । अलकोहलके प्रत्यक्ष असर महिला तथा बालबालिकामे परटी रहल एक कार्यक्रमके सहभागिहुक्रे बटैले बटै ।

सिविन नेपालके आयोजनामे विफेक रोज धनगढीमे हुइल कार्यक्रममे सरोकारवाला निकाय उ बाट बटैले रहिट । सिविन नेपालके धु्रव गौतम समाजमे तनाव ओ खुशीके बेला मादक पदार्थ लेना करल मने ओकर प्रत्यक्ष असर बालबालिकामे परल बटैलै ।

‘मदिरा सेवन ओ लागुपदार्थके दुव्र्यसनीके कारण बालबालिका तथा महिलाके जीवनके नकारात्मक प्रभाव डेखल बा,’ उहाँ कहलै –यिहीहे हटाई टे नइसेक्जाई मने नियन्त्रणके लाग न्यूनिकरण करे सेक्जाई ।’ विश्व स्वास्थ्य संगठनके तथ्याङकमे विश्वभर बार्षिक ३० लाख व्यक्तिके मादक पदार्थ सेवनके कारण मृत्यु हुइटी रहल गौतम बटैलै ।

मादक पदार्थके कारण १८ प्रतिशत आत्महत्या, १८ प्रतिशत झै झगडा, २६ प्रतिशत दुर्घटना, १३ प्रतिशत छरे रोग, ४८ प्रतिशत मृगौला भेल, २६ प्रतिशत मुख क्यान्सर, २० प्रतिशत क्षयरोग रोग, ५ प्रतिशत छातीके रोग ओ ७ प्रतिशत नइसर्ना रोग लग्टी रहल गौतम बटैलै । अलकोहलके कारण बैवाहिक जीवनमे नइ मजा असर, लर्ककके पढाईमे असर उहाँ कहलै । गोसिया गोसिनीय दारु पिठै कलेसे ओइनसे जलमना बच्चाके तौल कम रना, चकचके, सिकाई कमजोरी रना एक अध्ययनके समस्या डेखल बटैलै ।

सेती प्रादेशिक अस्पतालके नर्सिङ अफिसर यशोदा ढकाल अलकोहल नियन्त्रय कैना कानून केल भारी नइरहल बल्की समाज व्यक्ति सचेत हुइ पर्ना बटैली । मने महिला अधिकारकर्मी गोमा आचार्य कौनोफे नकारात्मक चिजहे नियन्त्रण कैना कानूनी आधार आवश्यक रहल बटैली । उहाँ कहली, ‘मुलुकी ऐन लागु हुइलपाछे बहुविवाह करुइयाके प्रतिशतमे कमी आइल बा, मदिरा उत्पादन, विक्री वितरण सम्बन्धी स्थानीय, प्रदेश ओ संघीय निति बनैलेसे यिहीसे पर्ना असर कम करे सेक्जाई ।’ मदिरा सेवन करके झै–झगडा करल मुद्दा परलेसेफे डारु पिके घटना घटाइल कहटी समाजसे क्षमा करटी रहल बटैली ।

जिल्ला प्रहरी कार्यालय कैलालीके महिला तथा बालबालिका शाखाके प्रमुख खेमराज भट्ट प्रहरी कार्यालयमे मादक पदार्थ सेवनसे महिला तथा बालबालिका परल असरबारे न्यून संख्यामे मुद्दा परल बटैलै । मादक पदार्थ खाके डगर घाटमे होहल्ला करल घटना प्रहरी अइना मने मादक पदार्थ सेवन करके श्रीमति बालबालिका कुटने मुद्दा खासे नइपरल बटैलै ।

कार्यक्रममे सिविन नेपालके कार्यक्रम निर्देशक कुमार भट्टराई सिविन नेपाल विगत ३३ वर्षसे बालबालिकाके अधिकार संरक्षण ओ प्रर्वद्धनके लाग व्रिmयाशिल नेपालके एक अग्रणी सामजिक अभियान संचालन करटी आइल बटैलै ।

सिविन नेपालके कोषाध्यक्ष सुवोध श्रेष्ठके अध्यक्षमे हुइल कार्यक्रमके संचालन बाल हेल्पलाइन १०९८ नेपाल(सिविन नेपाल) धनगढीके कार्यक्रम अधिकृत हरिलाल चौधरी करले रहिट ।