सुदूरपश्चिम प्रदेशस्तरीय भलिबल प्रतियोगिता मुख्यमन्त्रीसे उदघाटन

राष्ट्रहे चिन्हैना खेलाडीके सम्मानमे प्रदेश सरकार अग्रसर रहल भट्टके दाबी

पहुरा समाचारदाता
धनगढी, २० कुवाँर । कैलालीके धनगढीमे सुदूरपश्चिम प्रदेश स्तरीय पुरुष भलिबल प्रतियोगिता सुरु हुइल बा । प्रतियोगिताके बुधके रोज सुदूरपश्चिमके मुख्यमन्त्री त्रिलोचन भट्ट एक समारोहकाबिच उदघाटन करले बटै । प्रदेश खेलकुद परिषद्के आयोजनामे ९ जिल्लाके खेलाडीके प्रतिनिधित्व हुइना करके प्रदेशस्तरीय भलिबल प्रतियोगिता आयोजना करल हो ।

प्रतियोगिताके उदघाटन करटी मुख्यमन्त्री त्रिलोचन भट्ट प्रदेश सरकार खेलाडीके सम्मान तथा खेलकुदके विकासके लाग अग्रसर रहल बटैलै । ‘राष्ट्र तथा प्रदेशहे चिन्हाइक लाग अग्रसर रहल खेलाडीके सम्मान ओ खेल क्षेत्रके विकासके लाग पूर्वाधारके व्यवस्थापनमे प्रदेश सरकारसे कौनो कमी नइकरी,’ उहाँ कहलै, ‘सुदूरपश्चिम सरकारसे खेलकुदके विकासके लाग कार्यकालके सुरुवातसे मुख्यमन्त्री कपके आयोजना करल रहे । ओकरपाछे अब्बे ८८ ठो स्थानीय तहमे खेलकुद परिषद्के संरचनाके कामहे तीव्रता डेहल बा ।’ प्रदेश सरकारसे खेलकुद प्रशिक्षणके गतिविधि ओ सक्कु जिल्लामे पूर्वाधारके विकासके लाग तीव्रताके साथ काम करटी रहल मुख्यमन्त्री भट्टके दाबी बा ।

उदघाटन समारोहमे प्रदेशके सामाजिक विकास मन्त्री लालबहादुर खड्कासे प्रदेशके खेलकुद क्षेत्रहे थप चलायमान बनैना खेलकुद परिषद्हे थप सक्रिय बनैना काममे प्रदेश सरकार लागल बटैलै ।

प्रदेश स्तरीय पुरुष भलिबल प्रतियोगिता २०७८ सुदूरपश्चिम खेलकुद परिषद्के वार्षिक कार्यक्रम अनुसार कुवाँर २३ गतेसम धनगढीमे सञ्चालन हुइ । प्रदेशक ९ ठो जिल्लाके टिम सहभागिता जनैना प्रतियोगिताके विजेताहे नगद १ लाख सहित ट्रफी डेना पत्रकार सम्मेलनमे सुदूरपश्चिम खेलकुद परिषद्के सदस्य सचिव दीपकबहादुर सिंह जानकारी डेलै । उहाँक अनुसार प्रतियोगिताके उपविजेताहे नगद ५० हजार सहित ट्रफी डेजाई । प्रतियोगिताके सेमिफाइनलसम पुग्न दुई टिमहे २५/२५ हजार नगद सहित ट्रफी देजाई कलेसे टमान ५ ठो विधाके उत्कृष्ट खेलाडीहेफे पुरस्कार डेजाई ।

प्रतियोगिता सञ्चालनमे झन्डे ५० लाख खर्च हुइना अनुमान करल बा । जिल्लामे टिम छनोटके लाग सुरुमे ५० हजार डेहलमे जिल्लाहुक्रे अपन जिल्लाके टिम छनोट करले बटै । प्रतियोगितामे सहभागी सक्कु जिल्लाके टिमके यातायातसे खैना बैडना सक्कु खर्च सुदूरपश्चिम खेलकुद परिषद्से व्यहोर्ना सदस्य सचिव सिंह बटैलै ।

सुदूरपश्चिममे पहिल बार म्याटमे प्रतियोगिता सञ्चालन हुइटी बा । प्रतियोगितासे उत्कृष्ट खेलाडीहुकनहे समेटके सुदूरपश्चिम प्रदेशके भलिबल टिम बनैना सिंह बटैलै । उहाँ उ खेलाडीहे प्रशिक्षणके व्यवस्था करके प्रदेशके प्रतिनिधित्व करटी राष्ट्रिय प्रतियोगितामे सहभागिता जनैना सुदूरपश्चिम खेलकुद परिषदसे जनैले बा ।

मुख्यमन्त्री कपके विजेता खेलाडी ढाई वर्षपाछे पैलै पुरस्कार रकम

धनगढीमे २०७५ साल चैत्रमे सम्पन्न मुख्यमन्त्री कप अन्तर प्रदेश खेलकुद प्रतियोगिता च्याम्पियन टोली सुदूरपश्चिम प्रदेशके खेलाडी ढाई वर्षपाछे पुरस्कार रकम पैले बटै । सुदूरपश्चिम खेलकुद परिषद्से पुरस्कार रकम प्रदेश स्तरीय भलिबल प्रतियोगिताके उदघाटन समारोहमे खेलाडीहे डेहल हो ।

ढाई वर्षसम सुदूरपश्चिम खेलकुद विकास समिति ओ प्रदेशके सामाजिक विकास मन्त्रालयके संयुक्त खातामे रहल रकम बल्ल आके खेलाडीहे वितरण करल हो । टमान खेलमे पदक जिटल खेलाडीहे सुदूरपश्चिम प्रदेशके मुख्यमन्त्री त्रिलोचन भट्ट नगद रकम सहित खेलाडीहे सम्मान करले बटै । नम्मा समयपाछे पुरस्कार रकम पाके निराश रहल खेलाडी हर्षित हुइल बटै ।

खेलाडी जिटल पुरस्कार नइपाके निराशा पैदा हुइल अवस्थामे खेलकुद विकास समिति ओ मन्त्रालयसंग लरके रकम मग्टी खेलाडीहे वितरण करल सुदूरपश्चिम खेलकुद परिषद्के सदस्य सचिव दीपकबहादुर सिंह जानकारी डेलै ।

उहाँक अनुसार व्यक्तिगत ओर पहिल हुइलहे ३५ हजार, दुसरा हुइलहे २५ हजार ओ टिसरा हुइलहे १५ हजार नगद डेहल बा । ओस्टेक समूह ओर पहिल हुइल टिमहे जनही २८ हजारके दरसे रकम डेहल बा । ओस्टेक तीन खेलके प्रशिक्षक प्रति व्यक्ती नगद ११ हजार डेहल बा । प्रतियोगितामे आयोजक सुदूरपश्चिम प्रदेश ३ स्वर्ण, १ रजत ओ ३ कांस्य सहित च्याम्पियन बनल रहे । च्याम्पियन टोलीसे १५ लाख नगदमे सरकारी कर कट्टा करके ११ लाख २५ हजार रकमहे वितरण कैना हुइल बा ।

ब्याडमिन्टनमे दुई स्वर्ण जित्न देवराज राना ओ जेबी साउँदसे जनही ३५/३५ हजार पाके रजत जित्न नीलिमा महारा ओ रोशन साउँदसे जनही २५/२५ हजार पैलै । ओस्टेक कांस्य पदक जित्न रोशन साउँद प्रियशु सिंह क्षेत्री, अमृत चौधरी, योगेश खड्का ओ एलिना तिरुवा जनही १५/१५ हजार पैलै । प्रशिक्षक मेघराज कठायत नगद ११ हजार प्राप्त करलै ।

सुदूरपश्चिमके पुरुष फुटबल ओ महिला क्रिकेट टोली फे स्वर्ण जिटल रहे । टोलीके सदस्यहुक्रे जनही २८/२८ हजार पैले बटै । क्रिकेट प्रशिक्षक ज्ञानेन्द्र क्षेत्री नगद ११ हजार पाके १४ जाने खेलाडी २८ हजारके दरसे रकम पुरस्कार पैले बटै । पुरस्कार पैनामे कविता कुँवर, कविता जोशी, विन्दु रावल, ईश्वरी विष्ट, जानकी भट्ट, सुमन विष्ट, डल्ली भट्ट, रेवती धामी, निशा भट्ट, मञ्जु बोगटी, लक्ष्मी साउँद, रुवी पोदार, सम्झना खड्का ओ शोभा रोकाया रहल बटै ।

पुरुष फुटबलमे प्रशिक्षक रोहित भण्डारी ११ हजार पाके टोलीके १८ जाने सदस्य २८ हजारके दरसे रकम पुरस्कार पैले बटै । पुरस्कार पैनामे गजेन्द्र शाही, माधव भण्डारी, राकेश हमाल, नरेन्द्र चौधरी, कमल देउवा, सन्दीप कुँवर, भगेन्द्र चौधरी, अमानत सेख, जीवन चौधरी, चेतमान कठायत, हिक्मत खत्री, उनेश रेग्मी, टिका थापा, सुनिल धामी, सुनिल शाह, सुरेन्द्र राना, वीर धामी ओ प्रविन दाहाल रहल बटै ।