चोखाल स्मृति कपः तीन टीम सेमिफाईनलमे

पहुरा समाचारदाता
धनगढी, १४ कार्तिक । दुसरा टेकबहादुर चोखाल स्मृति कप फुटसल प्रतियोगितामे तीन ठो टीम सेमिफाईनल प्रवेश करले बा । शनिच्चरसे धनगढीमे जारी प्रतियोगिताके दुसरा दिन हुइल खेलके आधारमे तीन ठो टीम अन्तिम चारमे पुगल हुइट ।

चौठा टीमके टुङगो भर सोम्मार सकारे हुइना खेलसे टुङगो लगाई । टेकवहादुर चोखाल फाउण्डेसनके आयोजना ओ अभि मिडिया ईभेन्ट्स एण्ड स्पोर्टसके व्यवस्थापनमे हुइटी रहल प्रतियोगितामे धनगढीके वडा नम्बर ५, वडा नम्बर ४ ओ वडा नम्बर ७ सेमिफाईनल पुगल बा । वडा नम्बर ५ से गोदावरी वडा नम्बर ८ नइआइलपाछे वाकओभर पाइल कलेसे वडा नम्बर १२ हे हराके वडा नम्बर ७ फे सेमिफाईनल प्रवेश करले बा ।

ओस्टेक वडा नम्बर ४ फे गोदावरी वडा नम्बर १ हे पराजित करटी अन्तिम चारमे पुगल बा । सोम्मार सकारे धनगढीके वडा नम्बर १ ओ वडा नम्बर ३ ए बीच हुइना खेल टुङगो लागी । सोम्मार सेमिफाईनल ओ फाईनल खेल हुई । पहिल सेमिफाईनलमे वडा नम्बर ४ ओ ५ प्रतिस्पर्धा करी । दुसरा सेमिफाईनलमे वडा नम्बर ७ ओ वडा नम्बर १ ओ वडा नम्बर ३ ए बीचके विजेता प्रतिस्पर्धा करी ।

धनगढीके फल्याटल्याण्ड फुटसलमे प्रतियोगिता सञ्चालन हुइटी रहल दुसरा निसर्ग अस्पताल टेकबहादुर चोखाल स्मृति कपके विजेता नगद ५० हजार सहित ट्रफी मेडल पुरस्कार प्राप्त करी कलेसे उपविजेता नगद नगद २५ हजार सहित ट्रफी मेडल पुरस्कार प्राप्त करी ।
ओस्टेक प्रतियोगिताके उत्कृष्ट खेलाडी, उत्कृष्ट गोलरक्षक ओ सर्वाधिक गोलकर्तासेफे नगद सहित ट्रफी मेडल पुरस्कार प्राप्त करही ।