थप ४१२ मे कोरोना पुष्टि
काठमाडौं, १ अगहन । बिटल २४ घण्टामे थप ४१२ जहनमे कोरोना भाइरस संक्रमण पुष्टि हुइल बा ।
१० हजार १ सय ६ जहनके पीसीआर परीक्षणमे ३६३ जाने ओ १ हजार ८ सय ८७ जहनके एन्टिजेन परीक्षणमे ४९ जाने कैके ४१२ जहनमे कोरोना भाइरसके संक्रमण देखाइल स्वास्थ्य तथा जनसंख्या मन्त्रालय जनैले बा ।
अस्टेक बिटल २४ घण्टामे कोरोना संक्रमणसे १ जहनके मृत्यु हुइल बा कलेसे २०२ जाने ठिक हुइल बटैं ।
बुधके रोज थपलसँगे नेपालमे कोरोना संक्रमितके कुल संख्या ९ लाख १३ हजार २५८ पुगल बा । यीसँगे नेपाल मृत्यु हुइनाके संख्या ११ हजार ४८३ पुगल बा कलेसे ७ लाख ९८ हजार ९१६ जाने संक्रमणमुक्त हुइल बटैं ।
मन्त्रालयके अनुसार हाल देशभर सक्रिय संक्रमितके संख्या ७ हजार ६३६ जाने रहल बा । जेनमध्ये ७ हजार १६३ जाने होम आइसोलेसनमे बटैं कलेसे ४७३ जाने संस्थागत आइसोलेसनमे बटैं । कोरोनाके बिरामीमध्ये २२४ जाने आईसीयू ओ ६० जाने भेन्टिलेटरमे उपचाररत् बटैं ।
ओस्टेक, १० वर्ष टरेक ८ बालबालिकामे कोरोना संक्रमण पुष्टि हुइल बा कलेसे ११ से २० वर्ष उमेर समूहके २१ जाने कोरोना संक्रमित थपल बटैं ।
सेती प्रयोगशालामे थप १० जनहनमे कोरोना पुष्टि
धनगढीस्थित सेती प्रादेशिक अस्पतालके प्रयोगशालामे करल परिक्षणमे बुधके थप १० जनहनमे कोरोना पुष्टि हुइल बा ।
पाछेक २४ घण्टामे ४५ नमुना परिक्षण करेबर थप १० जनहनमे संक्रमण पुष्टि हुइल अस्पतालके सुचना अधिकारी दिलीप कुमार श्रेष्ठ जानकारी डेलै ।
ओहकान अनुसार २४ घण्टामे अस्पतालमे उपचाररत थप दुई जाने कोरोना संक्रमित चोखाके घर गैल बाटै कलेसे एक जाने लावा संक्रमित अस्पताल भर्ना हुइल बाटै । हाल अस्पतालमे चार जाने संक्रमित विरामीके उपचार हुइटी रहल बा ।
