सुदूरपश्चिम राजधानी कप २०७८ फुटवल प्रतियोगिता हुइना
पहुरा समाचारदाता
अत्तरिया, २५ अगहन । कैलालीके गोदावरी नगरपालिकाके मुख्य बजार अत्तरियामे ‘सुदूरपश्चिम राजधानी कप २०७८ फुटवल प्रतियोगिता’ हुइना बा ।
अत्तरिया रहल पिएफएम स्पोट्स क्लबके आयोजनामे अइना पुस ५ गतेसे १० गतेसम टिसरा संस्करणके सुदूरपश्चिम राजधानी कप फुटवल प्रतियोगिता हुइना हो ।
यी बर्ष पुरुष ओ महिला करके दुनु ओरसे खेल खेलैना पिएफएम स्पोट्स क्लबसे शनिच्चर पत्रकार सम्मेलनके आयोजना करके जानकारी डेहल हो ।
४७ लाख ६ हजार रुप्या खर्च हुइना अनुमान करल उ प्रतियोगिताके पुरुषओर विजेता हुइना टिमहे ५ लाख ओ उप विजेतासे २ लाख ५० हजार नगद सहित ट्रफि ओ मेडल प्रदान कैना पुरुष ओरके खेल संयोजक रविन्द्रराज भण्डारी जानकारी डेलै ।
ओस्टेक महिलाओरके विजेता टिम १ लाख ५० हजार ओ उप विजेता हुइना टिम ७५ हजार रुप्या नगद सहित ट्रफि ओ मेडल प्राप्त कैना उहाँ बटैलै । ओस्टेक दुनु ओर टमान विधामे उत्कृष्ट हुइना खेलाडीहुकनहे फे नगद ओ ट्रफि प्रदान कैजाई ।
सम्पूर्ण खेल गोदावरी नगरपालिका वडा नं ८ मे रहल शिवशक्ति खेल मैदान स्याउलेमे हुइना संयोजक भण्डारी बटैलै । प्रतियोगितामे सहभागि हुइक लाग कौनो उमेर समूह ओ क्षेत्र नइतोकल उहाँ बटैलै ।
उ प्रतियोगितामे अत्तरिया, धनगढी, कञ्चनपुर, बुटबल लगाएतके ठाउँसे करके पुरुषओर ८ टिम ओ महिलाओर ६ टिम सहभागिता जनैना पक्कापक्की हुइल आयोजक जनैले बा ।
आयोजक पिएफएम स्पोट्स क्लबके अध्यक्ष अमित बरालके सभापतित्वमे सम्पन्न हुइल पत्रकार सम्मेलनमे गोदावरी नगरपालिका वडा नं ८ के वडा अध्यक्ष नरेशबहादुर अधिकारी प्रमुख अतिथी रहिट ।
