धनगढीमे प्रधानमन्त्री महिला कप क्रिकेट प्रतियोगिता सुरु

प्रदेश नम्बर १ ओ लुम्बिनी प्रदेशके विजयी सुरुवात

पहुरा समाचारदाता
धनगढी, ३ पुस । कैलालीके धनगढीमे शनिच्चके रोजसे प्रधानमन्त्री कप महिला राष्ट्रिय क्रिकेट प्रतियोगिता सुरु हुइल बा ।

फाप्ला क्रिकेट मैदानमे सञ्चालन हुइल प्रतियोगिताके पहिल दिन हुइल खेलमे प्रदेश नम्बर १ ओ लुम्बिनी प्रदेश विजयी हुइल बटैं । प्रदेश नम्बर १ कर्णाली प्रदेशउप्पर १६० रनके फराकिलो जित दर्ता करलमे लुम्बिनी बागमतिहे ७ विकेटसे हराइल ।

प्रतियोगिताके पहिल खेलमे प्रदेश नम्बर १ विजयी हुइल बा । उद्घाटन खेलमे प्रदेश नम्बर १ कर्णाली प्रदेशहे १६० रनसे हराइल हो । कर्णाली प्रदेश ६ रनमे अलआउट हुइल ।

टस जितके पहिले ब्याटिंङ करल प्रदेश १ कप्तान रुविना क्षेत्री ओ अप्सरी वेगमके अर्धशतकके मदत्तमे २० ओभरमे २ विकेट क्षतिमे १६६ रन बनाइल । ७६ रनके पारी खेलल कप्तान क्षेत्री १० बलके सामना करटि १० चौका प्रहार करलि । अप्सरी ६१ रन बनाइबेर ६२ बलके सामना करटि ५ चौका प्रहार करलि । प्रदेश १ २९ रन अतिरिक्त पाइल । कर्णालीके लाग दिव्या धामी २ विकेट लेलि ।

प्रदेश १ से डेहल १६७ रनके लक्ष्य पछ्याइल कर्णाली ११ दशमलब ४ ओभरमे ६ रनमे सब विकेट गुमाइल । आघेक वर्ष हुइल प्रधानमन्त्री कपमे फेन कर्णाली ६ रनमे सीमित हुइल रहे । कर्णालीके लाग कप्तान आयुषा टण्डनसे बनाइल ३ रन सर्वाधिक रन हो । टोलीके लाग लक्ष्मी रिजाल ओ अंशु शाक्य एक÷एक रन बनाके ७ जाने खेलाडी भर शुन्यमे आउट हुइलैं । प्रदेश नम्बर १ के लाग अलिशा खडीया ५ विकेट लेलि । ओस्टेक संगीता राई दुई ओ सबनभ राई एक विकेट लेलि । ५ विकेट गिराइल अलिशा प्लेयर अफ द म्याच हुइलि ।

ओस्टेक, दोसर खेलमे बागमती प्रदेशउप्पर लुम्बिनी प्रदेशसे सानदार जित दर्ता करले बटि । टस जितके पहिले व्याटिङ करटि बागमति प्रदेश २० ओभरमे ७ विकेट क्षतिमे ७५ रन बनाइल । बागमतिके लाग हेलिशा गुरुङ २८ रन बनैलि । अन्य खेलाडी दोहोरो रन अंक छुए नैसेक्लैं । बागमति १५ रन अतिरिक्त पाइल । लुम्बिनीके लाग मधु डिसी ३ विकेट ओ सुस्मिता भुषाल २ विकेट गिरैलि । नेरी थापा ओ कप्तान सरस्वती जिएम एक÷एक विकेट लेनैं ।

जवाफी ब्याटिंङ सुरु करल लुम्बिनी प्रदेश १२ दशमलव ५ ओभरमे ३ विकेट क्षतिमे विजय लक्ष्य हासिल करले बा । लुम्बिनीहे जिटैना कप्तान सरस्वती जिएम सर्वाधिक २९ रन बनैलि । नितु भण्डारी १४ रन बनाके टीम १४ रन अतिरिक्त पाइल । बागमतिके लाग अस्मिना कर्माचार्य, आरती विडारी ओ खुशी डंगाल एक÷एक विकेट लेनैं । लुम्बिनीके लाग ३ विकेट लेहल मधु डिसी प्लेयर अफ द म्याच बन्लि ।
प्रतियोगिताके दोसर दिन फेन दुई ठो खेल सञ्चालन हुइ । पहिल खेलमे लुम्बिनी प्रदेश ओ कर्णाली प्रदेश प्रतिस्पर्धा करहि कलेसे दोसर खेलमे बागमति प्रदेश ओ प्रदेश नम्बर १ खेल्हि ।

नेपाल क्रिकेट संघके आयोजना ओ सुदूरपश्चिम प्रादेशिक क्रिकेट संघके सह आयोजनामे सञ्चालन हुइटिरहल प्रतियोगिताके यीआघे सुदूरपश्चिम प्रदेशके सामाजिक विकासमन्त्री लालबहादुर खड्का उद्घाटन करले रहैं । प्रतियोगिता पुस ११ गतेसम सञ्चालन हुइटा ।

प्रतियोगितामे प्रथम टिम ५ लाख, द्वितीय ३ लाख, ओम्यान अफ द सिरिज २५ हजार, बेस्ट बलर १५ हजार तथा बेस्ट व्याट्सओम्यान १५ हजार, ओम्यान अफ द म्याच २ हजार पुरस्कार प्राप्त करहि ।