लुम्बिनी ओ प्रदेश १ सेमिफाईनलमे

पहुरा समाचारदाता
धनगढी, ४ पुस । लुम्बिनीप्रदेश ओ प्रदेश नम्बर १ धनगढीमे हुइटी रहल प्रधानमन्त्री कप महिला राष्ट्रिय क्रिकेट प्रतियोगिताके सेमिफाईनलमे प्रवेश करले बटै । समुह ए ओर अपन दुनु खेलमे जित हात परटी लुम्बिनी ओ प्रदेश १ अन्तिम चारमे पुगल हुइट ।

प्रतियोगिताके दुसरा दिन हुइल पहिल खेलमे लुम्बिनी कर्णाली प्रदेशहे १० विकेटसे हराइल कलेसे प्रदेश १ वागमति प्रदेशहे रनसे हराइल ।

लुम्बिनी ओ प्रदेश १ अन्तिम चारमे

लुम्बिनी प्रदेश कैलालीके धनगढीमे हुइटी रहल प्रधानमन्त्री कप महिला राष्ट्रिय क्रिकेट प्रतियोगिताके दुसरा दिन हुइल पहिल खेलमे जित हात परटी लुम्बिनी प्रदेश सेमिफाईनलमे प्रवेश करले बा । लुम्बिनी कर्णाली प्रदेशहे १० विकेट हरैटी अन्तिम चारमे स्थान सुरक्षित करल हो । टस जिटके पहिले ब्याटिङ करटी कर्णाली प्रदेशसे हुस्सु ओ सितलहरके कारण ६ ओभरमे खेलाइल खेलमे १७ रन बनाइल ।

कर्णालीसे निर्धारित ६ ओभरमे ३ विकेट क्षतिमे १७ रन बनाइल । कर्णालीके लाग कप्तान आयुशा टण्डनसे ७ रन ओ दिक्षा पुरीसे अविजित ७ रन बनाइल । लुम्बिनी प्रदेशके लाग सुस्मिता भुषाल २ ओ नेरी थापासे एक विकेट लेली । कर्णाली प्रदेश यी आघे हुइल खेलमे प्रदेश १ से ६ रनमे अलआउटमे हुल रहे । कर्णाली प्रदेशसे डेहल १८ रनके लक्ष्य लुम्बिनी विना विकेट क्षति पुरा करल । ३ दशमलव १ ओभरमे कौनो विकेट नइगुमैटी लुम्बिनीहे सानदार जित डेहुवइना लक्ष्मी चौधरी १२ रन बनैली । लुम्बिनीके लाग नेरी थापा ५ रन बनैली । खेलमे दुई विकेट लेहल लुम्बिनी प्रदेशके सुस्मिता भुषाल प्लयर अफ द म्याच हुइली ।

प्रदेश नम्बर १ प्रधानमन्त्री कप महिला राष्ट्रिय क्रिकेट प्रतियोगिताके अन्तिम चारमे पुगल बा । दुसरा दिनके दुसरा खेलमे बागमति प्रदेशहे ५५ रनसे हरैटी प्रदेश नम्बर १ सेमिफाईनल पुगल हो ।

टस जिटके पहिले ब्याटिङ करटी प्रदेश नम्बर १ से निर्धारित २० ओभरमे ४ विकेट गुमैटी ११४ रन बनाइल । प्रदेश नम्बर १ के लाग अप्सरी वेगम अविजित अर्धशतकीय पारी खेल्ली । ६२ वलके सामना करल उहाँ ५१ रन बनैली । ओस्ैटेक स्मृति कटुवाल २० ओ सबनभ राई १५ रन बनैली । वागमति प्रदेशके लाग अस्मिना कर्माचार्य ओ खुशी डंगोल दुई दुई विकेट लेली ।

११५ रनके विजयलक्ष्य पछ्याइल वागमति प्रदेश २० ओभरमे ८ विकेट गुमैटी ५९ रनमे समेटल । वागमतिक लाग सुमन खतिवडा प्रतियोगिताके पहिल छक्का सहित २१ रनके पारी खेल्लेसेफे टीमहे जिटाई नइसेक्ली । कप्तान अस्मिना कर्माचार्य १० रन बनैना वाहेक और खेलाडी दोहोरो रन अंक छुए नइसेक्ले । वागमतिके ५ जाने खेलाडी रनआउट हुइलै । कप्तान रुविना क्षेत्री, ज्योती डनुवार ओ अलिशा खाडिया एक एक विकेट लेलै । खेलमे अर्ध शतकीय पारी खेलल प्रदेश १ के अप्सरी वेगम प्लेयर अफ द म्याच हुइली ।

बागमती ओ कर्णाली प्रतियोगितासे बाहेर

प्रतियोगिताके समुह ए मे रहल वागमति प्रदेश ओ कर्णाली प्रदेश प्रतियोगितासे बाहिरल बटै । दुनु जाने प्रदेश समुह चरणके खेलल दुन जाने खेलमे पराजित हुइटी प्रतियोगितासे बाहिरहल हुइट । कर्णाली प्रदेश पहिल खेलमे प्रदेश १ संग १६० रनसे पराजित हुइल कलेसे दुसरा खेलमे लुम्बिनी प्रदेशसंग १० विकेटसे हारल । वागमति प्रदेशफे लुम्बिनी प्रदेशसंग ७ विकेट ओ प्रदेश नम्बर १ सँग ५५ रनसे हार व्यहोरटी प्रतियोगितासे वाहेरल हो ।

काल्ह घरेलु ओ विभागीय टीमके भिडन्त

प्रतियोगिताके टिसरा दिन दुई ठो खेल हुइही । सोम्मारके दुई खेल समुह बीके टोली बीच हुई । पहिल खेलमे घरेलु टोली सुदुरपश्चिम ओ विभागीय टोली एफिएफ क्लब बीच प्रतिस्पर्धा हुई । दुसर खेलमे गण्डकी प्रदेश ओ प्रदेश नम्बर २ खेल्ही । नेपाल क्रिकेट संघके आयोजना ओ सुदूरपश्चिम प्रादेशिक क्रिकेट संघके सह आयोजनामे सञ्चालन हुइटी रहल प्रतियोगिता पुस ११ गतेसम सञ्चालन हुई ।

७ प्रदेश ओ एक विभागीय करके ८ टिम सहभागी प्रतियोगिता दुई समूहमे विभाजन करके खेलैटी बा । समूह ए मे प्रदेश नम्बर १, लुम्बिनी प्रदेश, बाग्मती प्रदेश, कर्णाली प्रदेश ओ समूह बी मे नेपाल एपीएफ क्लब, सुदूरपश्चिम प्रदेश, गण्डकी प्रदेश ओ प्रदेश नम्बर २ रहल बटैले बटै । प्रतियोगितामे प्रथम हुइना टिम ५ लाख, दुसरा ३ लाख, ओम्यानअफ द सिरिज २५ हजार, बेष्ट बलर १५ हजार तथा बेस्ट व्याट्स ओम्यान १५ हजार, ओम्यानअफ द म्याच २ हजार पुरस्कार प्राप्त करही ।

अप्सरी वेगमके लगातार दुसरा अर्धशतक

प्रदेश नम्बर १ के क्रिकेट खेलाडी अप्सरी वेगम लगातार दुसरा अर्धशतक मरले बटी । प्रधानमन्त्री कप महिला राष्ट्रिय क्रिकेट प्रतियोगिताके दुसरा खेलमे प्रदेश नम्बर १ के ओरसे वेगम दुसरा अर्धशतक मारल हुइट ।

धनगढीके फाप्ला मैदानमे हुइल दुसरा दिनके वागमति प्रदेश विरुद्धके खेलमे उहाँ ५१ रनके अविजित पारी खेल्ली । ६२ वलके सामना करल उहाँ दुई चौका प्रहार करली । वेगम शनिच्चर हुइल कर्णाली प्रदेश विरुद्धके खेलमे फे अर्धशतक बनैले रहिट । पहिल खेलमे अप्सरीस ६१ रन बनाईबेर ६२ बलके सामना करटी ५ चौका प्रहार करल रहिट ।

जारी प्रधानमन्त्री कपमे दुसरा अर्धतशक बनैना उहाँ पहिल खेलाडी हुइट । हालसम प्रतियोगितामे तीन ठो अर्धतशक बनल बटै । प्रदेशनम्बर १ के कप्तान रुविना क्षेत्रीसेफे कर्णाली विरुद्धके खेलमे अर्धशतक बनैले रहिट । ७६ रनके पारी खेलल कप्तान क्षेत्री १० चौका प्रहार करले बटी ।