समूह ए मे प्रदेश १ विजेता लुम्बिनी उपविजेता

पहुरा समाचारदाता
धनगढी, ६ पुस । धनगढीमे जारी प्रधानमन्त्री कप महिला राष्ट्रिय क्रिकेट प्रतियोगिताके समूह ए से प्रदेश नम्बर १ विजेता ओ लुम्बिनी प्रदेश उपविजेता बनल बा । समूह ए से यीआघे सेमिफाईनल पुगल डुनु टोलीमध्ये लुम्बिनीहे प्रदेश १ हराइल हो ।

फाप्ला मैदानमे मंगरके रोज हुइल पहिल खेलमे प्रदेश नम्बर १ लुम्बिनी प्रदेशहे ६७ रनसे हराइल । प्रदेश नम्बर १ टस जितके पहिले ब्याटिङ करटि निर्धारित २० ओभरमे ३ विकेट क्षतिमे ११४ रन बनाइल ।

प्रदेश नम्बर १ के लाग अप्सरी वेगम सर्वाधिक ४४ रन बनैलि । टीमके लाग काजोल श्रेष्ठ ४० रन बनैलि कलेसे कप्तान रुविना क्षेत्री १५ रन थप्लि । दोसर विकेटके लाग काजोल ओ अप्सरी ६२ रनके साझेदारी करटि टीमहे उच्च स्कोरओर डो¥याइलि ।

लुम्बिनी प्रदेशके लाग नेरी थापा, मधु डिसी ओ सरस्वती पुन एक÷एक विकेट लेलैं । ११५ रनके विजय लक्ष्य पछेरल लुम्बिनी ४७ रन किल बनाइ सेकल । निर्धारित २० ओभरमे लुम्बिनी ९ विकेट क्षतिमे ४७ रन बनाइल ।

लुम्बिनीके पारीमे कौनो फेन खेलाडी दोहोरो रन अंक जोरे नैसेक्लैं । सरस्वती पुन ओ नितु भण्डारीसे बनाइल नौ रन सर्वाधिक हो । तीन खेलाडी शुन्यमे आउट हुइलैं । तीनजाने रन आउट हूयलैं ।

प्रदेश नम्बर १ के लाग कप्तान रुविना क्षेत्री तीन विकेट लेलि । अलिशा खाडिया दुई ओ संगिता राई एक विकेट गिरैलि । खेलमे प्रदेश नम्बर १ के कप्तान रुविना क्षेत्री प्लेयर अफ द म्याच हुइलि ।

वागमतीके सान्तवना जित

ओस्टेक, प्रतियोगितामे वागमती प्रदेश सान्तवना जित हात परले बा । समूह ए अन्तर्गतके अन्तिम लिग खेलमे वागमति कर्णाली प्रदेशहे ७९ रनसे हटैले बा । सान्तवना जितसँगे वगमती प्रतियोगिताहे समापन करले बा कलेसे कर्णाली भर जित विहीन प्रतियोगिता टुंग्यइले बा ।

मंगरके रोज हुइल दोसर खेलमे टस जितके पहिले ब्याटिङ करटि बागमति प्रदेश निर्धारित २० ओभरमे ६ विकेट क्षतिमे १३० रन बनाइल । वागमतीके लाग कञ्चन श्रेष्ठ अविजित ४७ रनके पारी खेललि । ओस्टेक, हेलिशा गुरुङ २५ रन ओ अस्मिना कर्माचार्य १६ रन बनैलि । पहिल विकेटके लाग कञ्चन ओ हेलिशा ७२ रनके साझेदारी समेत करलि । कर्णाली प्रदेशके लाग दिव्या धामी ३ विकेट लेलि । एन्जिला क्षेत्री २ ओ निशा पराजुली एक विकेट गिरैलि ।

१३१ रनके विजय लक्ष्य पछेरल कर्णाली प्रदेश १८ दशमलव ३ ओभरमे ५१ रनमे समोटल । कर्णालीके लाग लक्ष्मी रिमाल सबसे ढेर १४ रन बनैलि । अन्य खेलाडी दोहोरो रन अंक बनाइ नैसेक्लैं । कर्णालीके लाग दीपा राना ९ रन बनैलि । अन्य खेलाडी ५ रन फेन पार करे नैसेक्लैं । वागमतीके लाग आरती विडारी ओ विपिशा शाही तीन÷तीन विकेट लेलैं । ओस्टेक, सोनी पाख्रिन, खुशी डंगोल ओ ज्ञानुका बस्नेत एक÷एक विकेट लेलैं । खेलमे वागमतिके कञ्चन श्रेष्ठ प्लेयर अफ द म्याच बन्लि ।

प्रतियोगिता अन्तर्गत बुधके रोज समूह बी के दुई खेल हुइटा । पहिल खेलमे सुदूरपश्चिम प्रदेश ओ विभागीय टीम एपिएफ क्लब खेलि । औरे खेल गण्डकी प्रदेश ओ प्रदेश नम्बर २ खेलि । नेपाल क्रिकेट संघके आयोजना ओ सुदूरपश्चिम प्रादेशिक क्रिकेट संघके सहआयोजनामे प्रतियोगिता सञ्चालन हुइटा ।

७ प्रदेश ओ एक विभागीय कैके ८ टिम सहभागी प्रतियोगिता दुई समूहमे विभाजन कैके खेलाजाइटा । समूह ए मे प्रदेश नम्बर १, लुम्बिनी प्रदेश, बाग्मती प्रदेश, कर्णाली प्रदेश ओ समूह बी मे नेपाल एपीएफ क्लब, सुदूरपश्चिम प्रदेश, गण्डकी प्रदेश ओ प्रदेश नम्बर २ रहल बा ।