प्रदेश नम्बर २ के पहिल जित, गण्डकी बाहर
पहुरा समाचारदाता
धनगढी, ७ पुस । विभागीय टीम एपिएफ धनगढीमे जारी प्रधानमन्त्री कप महिला राष्ट्रिय क्रिकेट प्रतियोगिताके सेमिफाईनलमे पुगल बा । बुधके पहिल खेलमे एपिएफसे सुदूरपश्चिमहे ८९ रनसे हराइल रहे । लगातार डुसरा जितसंगे एपिएफ सेमिफाईनल प्रवेश करल बा ।
सुदूरपश्चिमहे सेमिफाईनल पुगक लाग आबके अन्तिम प्रदेश नम्बर २ हे हराइ पर्ना बा । बुधके डुसरा खेलमे प्रदेश नम्बर २ से गण्डकी प्रदेशहे हरैटी सेमिफाईनल प्रवेशके सम्भावना कायम रख्ले बा । समूह बी मे दुई खेलमे डुनु जित हात परटी एपिएफ चार अंक सहित अंक तालिकाके शीर्ष स्थानमे रहल बा । समान दुई खेल खेलल् सुदुरपश्चिम ओ प्रदेश नम्बर २ के एकमे जित ओ एकमे हार सहित दुई अंक रहल बा ।
रनरेटमे सुदूरपश्चिम प्रदेश डुसरा स्थानमे रहल बा कलेसे प्रदेश नम्बर २ टिसरा स्थानमे रहल बा । चौथो स्थानमे रहल गण्डकी प्रदेश दुई खेलमे जित विहीन हुइटी अंक विहीन होके पुछारमे रहल बा । धनगढीके फाप्ला मैदानमे हुइल पहिल खेलमे टस हारके ब्याटिङ करल एपिएफे निर्धारित २० ओभरमे ६ विकेट क्षतिमे एक सय २८ रन बनाइल रहे ।
एपिएफके लाग ओपनर ईन्दु बर्मा सर्वाधिक ३३ रन जोरेबर राजमती ऐरी १९, रोमा थापा १६ ओ सरिता मगर १४ रन जोरल रहिट । सुदूरपश्चिमके लाग कप्तान रितु कनौजिया तीन तथा दिपा जोरा ओ कविता जोशी समान दुई विकेट लेहल रहिट । एक सय २९ रनके लक्ष्य पछ्याइल सुदूरपश्चिमके पारी एपिएफके बलिङ सामु टिके नैसेकल ।
सुदूरपश्चिम १४ ओभरमे सक्कु विकेट गुमैटी ३९ रन किल बनाइ सेकल रहे । सुदूरपश्चिमके लाग कप्तान रितु कनौजिया ओ रुवि पोदार समान १० रन बनाइल रहिट । अन्य खेलाडी दोहोरो रन अंक जोरे नैसेक्लै । एपिएफके लाग करुणा भण्डारी ४ विकेट लेहल रहिट । सोनु खड्का, रेखा रावल ओ सीता राना मगर समान १ विकेट लेहल रहिट । खेलमे ४ विकेट लेहल एपिएफके करुणा भण्डारी प्लेयर अफ द म्याच हुइली ।
प्रदेश नम्बर २ के पहिल जित, गण्डके बाहर
समूह ‘बी’ अन्तर्गत बुधके नै हुइल डुसर खेलमे भर प्रदेश नम्बर २ से गण्डकी प्रदेशहे हरैले बा । पहिल खेलमे एपिएफसँग हार व्यहोरल प्रदेश नम्बर २ से गण्डकी प्रदेशहे ७ विकेटसे हरैटी सेमिफाईनल प्रवेशके सम्भावना जिवित राखल हो । लगातार दुई हारसंगे गण्डकी प्रदेश भर प्रतियोगितासे बाहर हुइल बा ।
टस जितके पहिले ब्याटिङ कैटी गण्डकी प्रदेश ३९ रनके झिनो योगफलमे समेटल बा । १७ दशमलव १ ओभरमे सक्कु विकेट गुमाइल गण्डकीके लाग अञ्जली विश्वकर्मा सर्वाधिक १५ रन बनैली । अन्य खेलाडी दोहोरो रन अंक छुये नैपैटी गण्डकी १३ रन अतिरिक्त पाइल रहे । प्रदेश नम्बर २ के लाग सन्तोषी चौधरी ३ विकेट लेहल रही । ओस्टके अनुराधा चौधरी २, रोजी कडारी ओ सरस्वती चौधरी समान एक विकेट लेहल रही ।
४० रनके विजय लक्ष्य प्रदेश नम्बर २ से ३ विकेट क्षतिमे भेट्टाइल । १० दशमलव ३ ओभरमे जित हात पारक लाग ओपनरद्धय साना प्रविन ओ अनुराधा चौधरी पहिल विकेटके लाग २२ रनके साझेदारी करल रहिट । साना १३ रन बनाइबर अनुराधा १२ रन बनैली । गण्डकी प्रदेशके लाग शिला क्षेत्री एक विकेट लेहल रही । खेलमे प्रदेश नम्बर २ के सरस्वती चौधरी प्लेयर अफ द म्याच हुइल रही । प्रतियोगिता अन्तर्गत बिफेक रोज लिग चरणका अन्तिम दुई खेल हुइना बा । लिग चरणके डुनु खेल समुह बी के रहल बावै ।
पहिल खेलमे सुदूरपश्चिम प्रदेश ओ प्रदेश २ खेल्ना बावै । औरे खेलमे गण्डकी प्रदेश ओ एपिएफ खेल्ना बाटै । नेपाल क्रिकेट संघको आयोजना ओ सुदूरपश्चिम प्रादेशिक क्रिकेट संघके सह आयोजनामे सञ्चालन हुइटी रहल प्रतियोगिता पुस ११ गतेसम सञ्चालन हुइना बा ।
प्रतियोगितामे प्रथम हुउइया टिम ५ लाख, द्वितीय ३ लाख, ओम्यान अफ द सिरिज २५ हजार, बेष्ट बलर १५ हजार तथा बेस्ट व्याट्सओम्यान १५ हजार, ओम्यान अफ द म्याच २ हजार पुरस्कार प्राप्त कैना बाटै ।
