प्रदेश–२ हे हरैटी सुदूरपश्चिम प्रधानमन्त्री कपके सेमिफाइनल प्रवेश

पहुरा समाचारदाता
धनगढी, ७ पुस । प्रधानमन्त्री कप राष्ट्रिय महिला क्रिकेट प्रतियोगितामे सुदूरपश्चिम प्रदेश डुसरा जित हात परले बा । बिफेक रोज प्रदेश–२ हे ८७ रनसे पराजित करल हो । इ जितसंगे समूह ‘बी’ से सुदूरपश्चिम सेमिफाइनलमे स्थान पक्का करले बा । १४४ रनके विजयी लक्ष्य पछ्याइल प्रदेश–२ से २० ओभर नै ब्याटिङ कैलेसे फेन ८ विकेट गुमैटी ५६ रन किल बनाइ सेकल ।

ओकर लाग साना प्रविन अविजित १४ ओ विमला मगर १२ रनके योगदान डेहेबर अन्य ब्याटर दोहोरो अंकमे रन जोरे नैसेक्लै ।

प्रदेश–२ हे सस्तामे समेटक लाग लक्ष्मी साउँद ओ कविता जोशी दुई दुई तथा ईश्वरी विष्ट एक विकेट हात पारेबर तीन विकेट रन आउटके रूपमे प्राप्त हुइल रहे । इहीसे आघे धनगढीस्थित फाप्ला क्रिकेट मैदानमे टस हारके ब्याटिङके निम्तो पाइल सुदूरपश्चिम निर्धारित २० ओभरमे ५ विकेट गुमैटी १४३ रन बनाइल रहिट । ओकर लाग विन्दु रावल अविजित ५० रनके योगदान डेहल रहिट । ४५ बलके सामना करल उहँ ४ चौका प्रहार करल रही ।

ओस्टके, रूवी पोदार २१, डली भट्ट १५, कविता जोशी ओ संगिता मौनी १३ १३ रन बनाइल रहिट । प्रदेश–२ के लाग विमला मगर दुई तथा अनुराधा चौधरी ओ साना प्रविन एकएक विकेट हात पारल रहिट । एक विकेट भर रन आउटके रूपमे प्राप्त हुइल रहे ।

इ जितसंगे सुदूरपश्चिम ३ खेलमे ४ अंक जोरेबर समान खेलसे २ अंकके साथ प्रदेश–२ प्रतियोगितासे बाहर हुइल बा ।