प्रतियोगिताके सेमिफाईनल समिकरण पुरा
पहुरा समाचारदाता
धनगढी, ८ पुस । धनगढीमे जारी प्रधानमन्त्री कप महिला राष्ट्रिय क्रिकेट प्रतियोगिताके सेमिफाईनल समिकरण पुरा हुइल बा । पुस ३ गतेसे सुरु हुइल प्रतियोगितामा बिफेक रोज लिग चरणके सब खेल निम्जलसँगे सेमिफाईनल समिकरण पुरा हुइल हो ।
समूह बी से विभागीय टीम समूह विजेता बन्टि सेमिफाईनल पुगल कलेसे समूह उपविजेता घरेलु टोली सुदूरपश्चिम फेन अन्तिम चारमे पुगल बा । समुह ए से समूह विजेता बन्टि प्रदेश १ ओ उपविजेता बन्टि लुम्बिनी प्रदेश सेमिफाईनल पुगल बा ।
बिफेक हुइल खेलमे सुदूरपश्चिम ओ एपिएफ विजयी हुइल । फाप्ला क्रिकेट मैदानमे पहिल खेलमे जितके सुदूरपश्चिम अन्तिम चारमे पुगल बा । समुह बी अन्तर्गतके खेलमे सुदूरपश्चिम प्रदेश प्रदेश २ हे ८७ रनसे हराइल हो । पहिल खेलमे जिटल सुदूरपश्चिम दोसर खेलमे एपिएफसँग हार व्यहोरले रहे । तीन खेलमे दुईमे जित ओ एकमे हार सहित चार अंक जोरल सुदूरपश्चिम सेमिफाईनलमे स्थान बनैना सफल हुइल ।
टस हटके सुदूरपश्चिम पहिले ब्याटिङ करटि २० ओभरमे ५ विकेट क्षतिमे १४३ रन बनाइल । सुदूरपश्चिमके लाग विन्दु रावल अर्धशतकीय पारी सहित ५० रन बनैलि । ओस्टेक, रुवि पोदार २१ रन, डल्ली भट्ट १५ रन बनैलि कलेसे कविता जोशी ओ संगीता धामी समान १३ रन बनैलैं ।
प्रदेश २ के लाग विमला मगर २ विकेट लेलि । ओस्टेक, साना प्रविन, अनुराना चौधरी एक/एक विकेट लेनैं । १४४ रनके विजय लक्ष्य पछेरल प्रदेश–२ ५६ रन किल बनाइ सेकल। प्रदेश–२ २० ओभरमे ८ विकेट गुमाके ५६ रन किल बनाइल हो ।
प्रदेश–२ के लाग साना प्रविन अविजित १४ ओ विमला मगर १२ रन बनैलि । अन्य खेलाडी दोहोरो रन अंक छुए नैसेक्लैं । सुदूरपश्चिमके लाग कविता जोशी ओ लक्ष्मी साउँद समान २ विकेट लेनैं । ईश्वरी विष्ट १ विकेट लेलि । सुदूरपश्चिमके विन्दु रावल प्लेयर अफ द म्याच बन्लि ।
ओस्टेक, दोसर खेलमे एपिएफ अपराजित यात्रा कायम ढैटि समुह विजेता बनल बा । एपिएफ गण्डकी प्रदेशहे एक सय १७ रनसे हटाइल हो । टस जिटके पहिले ब्याटिङ करटि निर्धारित २० ओभरमे ४ विकेट क्षतिमे एक सय ५० रन बनाइल । उ पारीमे मध्यक्रमके खेलाडी ममता चौधरी ४३ रन बनैलि । ओस्टेक, सरीता मगर अविजित २६ रन बनैलि कलेसे रोमा थापा २६ रन बनैलि । ज्योति पाण्डेय २४ रन जोरलि । गण्डकी प्रदेशके लाग मनिषा उपाध्याय एक विकेट लेलि । एपिएफके ३ जाने खेलाडी रनआउट हुइलैं ।
एक सय ५१ रनके लक्ष्य पछेरल गण्डकी प्रदेश ३३ रन किल बनाइल । २० ओभरमे ७ विकेट गुमाके ३३ रन बनाइबेर गण्डकीके लाग शिला क्षेत्री सर्वाधिक ८ रन बनैलि । अन्य खेलाडी दोहोरो रन अंक जोरे नैसेकल अवस्थामे १३ रन अतिरिक्त प्राप्त हुइल । एपिएफके लाग करुणा भण्डारी ओ सुष्मा श्रेष्ठ समान २ विकेट लेलैं । सोनु खड्का, सुमन बिष्ट ओ सीता राना मगर समान १ विकेट लेलैं । खेलमे एपिएफके ममता चौधरी प्लेयर अफ म्याच बन्लि ।
प्रतियोगिता अन्तर्गत शनिच्चर सेमिफाईनल ओ अँट्वारके फाईनल खेल हुइना बा । नेपाल क्रिकेट संघके आयोजना ओ सुदूरपश्चिम प्रादेशिक क्रिकेट संघके सहआयोजनामे प्रतियोगिता सञ्चालन हुइटा ।
सुदूरपश्चिमके विन्दु रावलके अर्धशतक
ओस्टेक, प्रतियोगितामे चौठा अर्धशतक बनल बा । बिफेक रोज हुइल लिग चरण अन्तर्गतके पहिल खेलमे सुदूरपश्चिम प्रदेशके विन्दु रावल अविजित अर्धशतक बनैले बिट ।
प्रदेश २ विरुद्धके खेलमे उहाँ ५० रनके अर्धशतकीय पारी खेललि । ४५ बलके सामना करल उहाँ चार चौका प्रहार करलि । ४४ बलमे ४६ रनके अवस्थामे रहलमे बिन्दु पहिल ईनिङके अन्तिम बलमे चौका प्रहार कैके अर्धशतक पुरा करले बटि ।
यी प्रतियोगिताके चौठा अर्धशतक हो । यीआघे प्रदेश १ के लाग अप्सरी वेगम दुई चो अर्धशतक बनैले बटि । प्रदेश १ के कप्तान रुविना क्षेत्री फेन एक अर्धशतक बनैले बटि ।
