सिकलसेल ओ थारु समुदाय

कैलाली ओ कञ्चनपुरके थारु समुदायके व्यक्तिन्मे सिकलसेल एनिमिया रोग चुनौतीके रुपमे डेखा परे लागल तथ्याङ्क डेखैले बा । इहे अठवार कञ्चनपुरके शुक्लाफाँटा नगरपालिका–३ जोनापुरमे सिकलसेल एनिमिया पहिचान ओ निदानके लाग निःशुल्क रगत परीक्षण शिविरमे ४०१ जन्हनके रगत परीक्षण करल मन्से १७ जनहनमे सिकलसेल एनिमियाके ट्रेट (बाहक) फेला परल । ओस्टक कृष्णपुर नगरपालिका–४ मे ३६५ जानेक रगत परीक्षण करलमे ४२ जनहनमे ट्रेट (बाहक) फेला परल ।

सेती प्रादेशिक अस्पतालके सामाजिक सेवा एकाइ प्रमुख गौरीदत्त जोशीके अनुसार सिकलसेलसे कैलाली ओ कञ्चनपुरके ७ सय ढेर व्यक्ति पीडित बटै, जेम्ने प्रायः थारु समुदायके बाटैं । निःशुल्क रगत परीक्षण शिविरमे जँचैना बाहेक अपन मनसे नै जँचैना बान रहलओर्से इ संख्या आउर ढेर हुइ सेकठ । सिकलसेल एनिमिया रोग पहिचान नइहुइल रोगीनके संख्या गाउँघरमे ढेर रहल अनुमान बा । मने यकिन विवरण भर कौनो निकायमे नइ हो ।

सिकलसेल एनियमियाके स्रोतव्यक्ति सिद्धराज भट्टके अनुसार इहे अठवार परिक्षण करल फेला परल व्यक्तिके रगतहे फेरसे परीक्षणके लाग कैलालीके सेती प्रादेशिक अस्पतालमे पठागइल बा । थप परीक्षणपाछे केल बाहक केल हो वा सिकलसेल एनिमिया हो कनाबारे जानकारी हुइ ।

सुदूरपश्चिममे कैलालीके सेती अस्पतालमे केल रोग पहिचानके व्यवस्था मिलाइल बा । सिकलसेल एनिमिया डेखा परलेसे बिरामीहे उपचारके लाग सरकारके ओरसे रु एक लाख अनुदान उपलब्ध करैना व्यवस्था बा । जिन्गिभर डवाइ खाई पर्ना हुइल ओरसे एक लाख रुप्या अपर्याप्त रहल सिकलसेलसे संक्रमितन्के कहाइ बा । अनुदानबापत मिल्ना रकम बेरामीहे नगद नैडेके अस्पतालसे उ मोल बराबरके डवाइ रोगीहे उपलब्ध हुइठ ।

सिकलसेल एनिमिया रगतके लाल रक्तकोषमे ओकर सख्या घटैटी लैजाइठ । सिकलसेल रहल व्यक्तिमे शरीरके टमान अंगमे अक्सिजन सहितके लाल रक्तकोष पर्याप्त मात्रामे पुगे नइसेक्के यी फोक्सा, मिर्गौला, मस्तिष्कलगायतके अंगमे क्षति पुगाइठ । लाल रक्तकोषके आकार परिवर्तन हुके हँसियाके रूप जस्टे घुमल अर्ध चन्द्रकारमे रक्त कोषिका रहठ । इहिसे रगतके कमी हुइठ । लावा रगत नै बन्टि कि बेरामी कमजोर हुइटि जैठैं ।

सिकलसेल रोग वंशानुगत रोग हुइल ओरसे परिवारमे ऐसिन रोगसे पीडित व्यक्ति हुइलेसे रगत परीक्षण कैके केल उमेर पुगल युवा भोज करलेसे उपयुक्त हुइना चिकित्सलोगनके कहाइ बा । ओहेसे रोगि होके जिन्गिभर डवाइ करैनासे भोजसे पहिले जो अपन हुइना पटुहिया या डम्डाके रगत परिक्षण कराइ ।