सुदूरपश्चिमके विकास योजना बनैना खटागिल टोली
धनगढी, १४ पुस । प्रधानमन्त्री तथा काँग्रेस सभापति शेरबहादुर देउवासे सुदूरपश्चिमके विकास योजनाके खाका बनैना राष्ट्रिय योजना आयोगके उपाध्यक्ष डा.विश्व पौडेलसहित पार्टी केन्द्रीय सदस्य नैनसिंह महरहे सुदूरपश्चिम खटैले बटै ।
उपाध्यक्ष पौडेलके अनुसार उ टोली ९ जिल्लामे पुगके योजनाके खाका बनाई । सक्कु स्थानीय तहके जनप्रतिनिधिसहित पार्टीके नेताहुकनहे समेत जिल्लामे हुइना विकास छलफल तथा सुझाव संकलनमे उपस्थित हुइना निम्ता करल बा ।
प्रधानमन्त्री देउवा ओ केन्द्रीय सदस्य आरजु राणा देउवा विशेष चासोके साथ खटाइल टोली सुदूरपश्चिममे अइना निर्वाचनहे समेत ध्यानमे धारके योजना बनैना ओ भारी रोजगारी सृजना करे सेक्ना करके योजनाके खाका बनाई । पार्टी महाधिवेशनमे भारी मतके साथ दुसरा चा सभापतिमे विजय हुइलपाछे प्रधानमन्त्री देउवा सुदूरपश्चिमके योजनाके खाका बनाई लागल बटै ।
उहे अनुसार पौडेल ओ महर सहितके टोली सुदूरपश्चिमके ९ जिल्लामे क्रमशः योजना तर्जुमा ओ निर्माणबारे अन्तरक्रिया करी । १४ औँ महाधिवेशनके १४ एजेण्डासहित लोकप्रिय मतके साथ केन्द्रीय सदस्यमे जिटल गृह जिल्ला डडेल्धुराके युवा नेता महरहे यकर समन्वय कैना जिम्मेवारी डेनाहे अर्थपूर्ण रुपमे हेरल बा ।
यिहे क्रममे बुधके रोज धनगढीमे सप्पन्न एक अन्तरक्रियामे धनगढी उपमहानगरपालिका प्रमुख एवं नेपाली काँग्रेसके केन्द्रीय सदस्य नृप वड, उपप्रमुख एवम् नेपाली काँग्रेस केन्द्रीय सदस्य सुशीला मिश्र भट्ट, राष्ट्रिय योजना आयोगके सदस्य डा.पुष्परमण वाग्ले, युवा स्वरोजगार कोषके कार्यकारी अधिकृत विश्वमोहन अधिकारी, नेपाली काँग्रेस सुदूरपश्चिम प्रदेश महामन्त्री नरनारायण शाह, कैलाली क्षेत्र नं. ५ के सभापति भीम पडाल लगायतके नेता आ अपन मन्तव्य राखल रहिट ।
