रेशम चौधरीसे नागरिक उन्मुक्ति पार्टी गठन
पहुरा समाचारदाता
काठमाडौं, १९ पुस । डिल्लीबजार कारागारमे रहल सांसद रेशम चौधरी लावा पार्टी गठन करले बाटै । चौधरी सोम्मारके आपन गोसिनीया रञ्जिता श्रेष्ठके अध्यक्षतामे नागरिक उन्मुक्ति पार्टी गठन करल हुइट । अपने अध्यक्षतामे उक्त पार्टी गठन करे लागल रलेसे फेन उ सम्भव नैहुइलपाछे चौधरी आपन गोसिनीयाके नाउँमे पार्टी गठन करल हुइट ।
लावा पार्टी दर्ता कैना श्रेष्ठसहितके टोली सोम्मारके दुपहर निर्वाचन आयोगमे पुगल रहे । डिल्लीबजार कारागारके अनुसार चौधरी पार्टी दर्ताके लाग अपनहे निर्वाचन आयोग जाइ खोजल रहिट । उहाँ अँट्वारके कारागार व्यवस्थापन विभाग ओ निर्वाचन आयोगमे निवेदन डेहल रहिट । मने उहाँ जाइ नैपैलै ।
चौधरी टीकापुर घटनामे एसएसपी लक्ष्मण न्यौपानेसहितके हत्या आरोपमे जेलमे बाटै । चौधरी राष्ट्रिय जनता पार्टीमे आवद्ध रहिट । राष्ट्रिय जनता पार्टी फुटके लोकतान्त्रिक समाजवादी पार्टी गठन हुइलपाछे चौधरी उहे पार्टीमे रहिट । मने, थरुहट आन्दोलन ओ बन्दी रिहाबारे सरकार, मधेसी दल कोइ फेन चासो नै डेखाइलपाछे अपनहे दल खोल्ना निर्णयमे पुगल हुइट ।
